कैलाली, भदौ २२ – कैलालीको भजनी नगरपालिका–७ स्थित चर्रा गणेशमान चोक नजिकै भएको सवारी दुर्घटनामा एक युवकको ज्यान गएको छ।
जिल्ला प्रहरी कार्यालय कैलालीका अनुसार आइतवार दिउँसो पश्चिमबाट पूर्वतर्फ गइरहेको युपी–३१–एयु–७३२० नम्बरको भारतीय मोटरसाइकललाई विपरीत दिशाबाट आइरहेको स्कारपियो जिप (बिएबी ४५९२ नम्बर) ले ठक्कर दिएको थियो। ठक्करबाट गम्भीर घाइते भएका मोटरसाइकल चालक भजनी–७ का २० वर्षीय कुल्दिप धोबीलाई तत्काल उपचारका लागि नवजिवन अस्पताल, धनगढी लगिएको थियो। तर सोही दिन उपचारको क्रममा उनको मृत्यु भएको हो।
दुर्घटनामा संलग्न स्कारपियो र त्यसका चालक बाँकेको कोहलपुर नगरपालिका–२ निवासी ४३ वर्षीय शेर बहादुर बिश्वकर्मालाई प्रहरीले नियन्त्रणमा लिएको छ। हाल घटनाबारे थप अनुसन्धान भइरहेको जिल्ला प्रहरी कार्यालयले जनाएको छ।
सडक दुर्घटनाबाट ज्यान गुमाउनेको सङ्ख्या बढ्दो क्रममा रहेको सन्दर्भमा यो घटना पनि लापरवाही र ट्राफिक अनुशासन उल्लंघनको गम्भीर उदाहरणका रूपमा देखिएको छ।
