डोटी, २०८२ वैशाख २०
डोटी जिल्लाको आदर्श गाउँपालिका–३, काडे गाउँस्थित भित्री सडक खण्डमा ट्रयाक्टरको ठक्करबाट एक ९ वर्षीय बालक घाइते भएका छन्।
शुक्रबार दिउँसो करिब ३ बजे काडे गाउँबाट काडे स्याउलेतर्फ आउँदै गरेको नम्बर नखुलेको ट्रयाक्टरले स्थानीय राजेश दमाईका छोरा विशाल दमाईलाई ठक्कर दिएको हो। टाउकोमा गम्भीर चोट लागेका बालकलाई स्थानीय स्वास्थ्य चौकीमा प्रारम्भिक उपचारपछि थप उपचारको लागि सेती प्रादेशिक अस्पताल, धनगढी पठाइएको आफन्तहरूले जनाएका छन्।
प्रहरीका अनुसार ट्रयाक्टर घटनास्थलमै छोडिएको अवस्थामा भेटिएको छ भने चालक भने फरार रहेको हुनसक्ने अनुमान गरिएको छ। घटनाको थप अनुसन्धान भइरहेको प्रहरीले जनाएको छ।
