काठमाडौँ । त्रिभुवन विश्वविद्यालय केन्द्रीय क्याम्पसका स्ववियु सभापतिकाे कार्यालय तोडफोड गरिएकाे छ । शनिवार नेपाल विद्यार्थी संघ (कांग्रेस निकट) बाट निर्वाचित स्ववियु सदस्यहरुले नै सभापति श्यामराज ओझाको कार्यालय तोडफोड गरेका छन् । स्ववियु सभापतिकाे कार्यालय तोडफोड भएसँगै सभापति ओझाको राजीनामा मागेका छन्।
ओझामाथि सभापति निर्वचित भए देखिनै कर्मचारी, प्राध्यापकहरुको सरुवा बढुवामा पैसा खाएर भागबन्डा मागेको, विश्वविद्यालयभित्र हुने निर्माणका कामहरु रोकेर निर्माण व्यवसायीसँग पैसा उठाएको, स्ववियुले गरेको आन्दोलनलाई सिमित प्राध्यापक र कर्मचारीको प्रभावमा परेर आन्दोलन नै समाप्त पारेको, प्रिन्सिपल र लेखासँगको मिलेमतोमा विश्वविद्यालय भित्रको माटो बेची खाएको आरोप लगाएका छन् ।
यता सभापति ओझाले कार्यालयका केही कुर्सीहरु ढालिए पनि तोडफोडै चाहिँ नभएको जिकिर गरे । उनले सो कार्य विभिन्न समूहले गरेको कुरा आए पनि कसले गरेको हो भन्ने यकिन नभएको बताए । उनले आफूमाथि विभिन्न आरोप लगाए पनि कुनै पनि समूहले आफूसँग छलफल नगरेको स्पष्ट पारेका छन् । सभापति ओझाकाे गृह जिल्ला डाेटी हाे ।
