मनमाेहन ठकुल्ला, डाेटी
डाेटीमा माैरीपालन व्यवसाय फस्टाउदै गएको छ । आर्थिक वर्ष २०७८/०७९ र गत आर्थिक वर्ष २०७९/०८० काे तथ्यांक अनुसार वर्षेनी माैरीपालन व्यवसायीक रूपमा बृद्वी हुँदै गएकाे पाइएको हाे ।

आर्थिक वर्ष २०७८/७९ मा ६३० घार माैरी घारबाट ३ हजार १ सय ५० किलाेग्राम उत्पादन हुन गई करिव ४५ लाख रूपैयाँकाे हाराहारीमा आमदानी भएकाे कृषि ज्ञान केन्द्र डाेटीले जानकारी दिएकाे छ ।

त्यस्तै गत आर्थिक वर्ष २०७९/०८० मा ८ सय मौरी घारबाट ५ हजार ५ सय किलोग्राम मह उत्पादन हुन गइ ५५ लाख रुपैयाँ आम्दानी भएको तथ्यांकमा उल्लेख गरिएकाे छ । यसरी २ वर्षको तथ्यांककाे दाँजोमा जिल्लामा वर्षेनी कृषि ज्ञान केन्द्रबाट अनुदान लिई व्यवसायीक रूपमा माैरी पालन गर्नेकाे संख्या वृद्धि हुँदै गएकाे देखिन्छ ।

याे २ वर्षकाे प्रस्तुत तथ्यांक माैरीपालन व्यवासायीक रूपमा अनुदान लिएका किसानहरूकाे मात्रै रहेको र जिल्लामा उत्पादन भएको महको अझै यकिन तथ्याङ्क हुन नसकेको कृषि ज्ञान केन्द्र डोटीका निमित्त प्रमुख गङ्गादत्त अवस्थीले बताए ।

माैरीपालनकाे सन्दर्भमा निर्वाहमूखी माैरीपालक कृषकहरूले पनि कति मह उत्पादन गर्छन् भन्ने कुरा तथ्याङ्कमा समावेश नभएको हुन सक्ने अनुमान गरिएकाे छ । कृषि ज्ञान केन्द्रले माैरीपालन पकेटको रूपमा जोरायल गाउँपालिका, बडीकेदार गाउँपालिका र बोगटान फुड्सिल गाउँपालिका गरी जिल्लाका ३ स्थानीय तहलाई राखिएकाे छ ।

निमित्त प्रमुख अबस्थिले भने जिल्ला भित्र व्यवसायीक रूपमा मौरी पालकहरूकाे तथ्यांक संकलन गरिएकाे छ । चालु आर्थिक वर्ष २०८०/०८१ मा व्यवस्थित तथ्यांक संकलनका लागि सम्बन्धित स्थानीय तहकाे कृषि शाखालाई जिम्मेवारी सुम्पेर जानकारी दिएकाे छ ।

कृषि ज्ञान केन्द्र डाेटीले ‘मौरी प्रवर्द्धन कार्यक्रम’ अन्तर्गत मौरी पाल्न ईच्छुक किसानका लागि ५० प्रतिशत अनुदान दिने भएकाे छ । वर्तमान समयमा डोटीका माैरीपालकले ८ सय देखी १२ सय रुपैयाँ प्रति किलो दर भाउले मौरीको मह बेच्दै आएकाे पाइन्छ । जिल्लाका प्रायः सबै क्षेत्रमा मेलेफेरा र सेरेना गरी दुई प्रजातिका मौरी पाइन्छन् ।