सिलगढी/ डोटी जिल्लाकाे पूर्विचौकी गाउँपालिकाका ६ वडाका बासिन्दालाई डिजिटल कृषि तथा पशु परामर्श सेवा केन्द्र सम्बन्धी जानकारी गराइएको छ ।

जिओ कृषि र पूर्विचौकी गाउँपालिकाे साझेदारीमा गाउँपालिकाका कृषि सहकारी संस्थाका सेयर सदस्य, कृषक समूहका सदस्य, आमा समूहका सदस्य,  कृर्षी तथा पशुपक्षी फर्म र अगुवा कृषकहरूलाई डिजिटल कृषि तथा पशु परामर्श सेवा सम्बन्धी जानकारी गराइएको हाे ।

जिओ कृषीका राजेश काेलीका अनुसार पालिका भित्र विभिन्न समयमा वडा नम्बर १ खिरसैनका १ सय ६५ र वडा नम्बर ३ गैरागाउँका ४९, वडा नम्बर ४ सानागाउँका २ सय २३ , वडा नम्बर ५ काँडामाण्डाैँका २ सय ६२, वडा नम्बर ६ गाजरीका दुई सय ५४ र वडा नम्बर ७ पोखरीका ९८ जना गरी जम्मा १ हजार ५१ जनालाई उक्त विषयमा जानकारी गराइएको छ । कृषि बाली तथा पशुपालनमा देखिने समस्याको कम लागतमा सजिलै समाधान गर्न सक्ने भएकाले प्राविधिक ज्ञान दिइन थालिएको काेलिले बताएका छन् ।

मौसम सम्बन्धी सही सूचना कसरी प्राप्त गर्ने, किसाने उत्पादन गरेका उपजलाइ कसरी बजारीकरण गर्ने र कृषि उपजको उत्पादन कसरी बढाउने लगायतको कृषि सम्बन्धी सम्पूर्ण जाँनकारी दिँदा स्थानीयले खुसी व्यक्त गरेका छन् ।

स्थानीय तहमा रहेको कृषि परामर्श सेवा केन्द्र मार्फत कृषकहरूलाई सही समयमा कृषि सम्बन्धी आवश्यक जानकारी दिने उद्देश्यले पूर्विचौकी गाउँपालिकामा यस्ता कार्यक्रम भइरहेकाे गाउँपालिकाले जानकारी दिएकाे छ ।

वर्तमान समयमा मोबाइलबाट जिओ कृषि एप प्रयाेगमा ल्याउन सकिने व्यवस्था रहेकाे छ । जुन एप्लिकेशनमा किसानले नाम दर्ता गरेर समस्याको बारेमा लेखेर, फोटो खिचेर पठाउनुपर्ने हुन्छ । त्यसपछि जिओ कृषि एप्लिकेशनबाट बजार मूल्य, ५ दिन सम्मको मौसमको जानकारी, बालीनालीमा देखिने समस्याको परामर्श लगायतका विषयमा जानकारी लिन सकिन्छ ।