मोहन सिं ठकुल्ला,
सिलगढी/ जिल्ला प्रशासन कार्यालय डोटी मार्फत भूकम्प प्रभावितहरुका लागि नगद तथा राहद सामग्री हस्तान्तरण गरिएको छ ।
डोटी उद्योग वाणिज्य संघ र होटल व्यवसायी संघ डोटीको संयुक्त टोलीले मंगलबार जाजरकोट र रूकुम पश्चिमका भुकम्प पिडितका लागि राहत संकलन गरी प्रमुख जिल्ला अधिकारी गोपाल प्रसाद अर्याल मार्फत नगद हस्तान्तरण गरेको हो ।
संयुक्त रुपमा संकलन गरेको नगद रु. १ लाख ४४ हजार ४ सय १९ रहेको डोटी उद्योग बाणिज्य संघका अध्यक्ष बिक्रम साँउदले बताए । जिन्सी राहत सामाग्री सम्बन्धित जिल्लाको उद्योग बाणिज्य संघ मार्फत वितरण हुने गरी भोलिनै पठाइने होटल व्यवसायी संघका अध्यक्ष लोक बहादुर खड्काले बताए ।
हस्तान्तरण भएको नगद रकम जिल्ला प्रशासनले केन्द्रिय दैविक प्रकोप उद्धार कोषमा जम्मा हुने गरी बैंक मार्फत पठाइने प्रमुख जिल्ला अधिकारी अर्यालले बताएका छन् ।
हस्तान्तरण कार्यक्रममा बाणिज्य संघका अध्यक्ष साउँद, बरिष्ठ उपाध्यक्ष प्रेम भण्डारी, उपाध्यक्ष दीर्घ बहादुर साउँद, दिसिनपा वडा नम्बर ५ का वडा अध्यक्ष गणेश भण्डारी, होल व्यवसायी संघका अध्यक्ष खड्का, बरिष्ठ उपाध्यक्ष लाल बहादुर मन्नी, महासचिब हरिष कुँवर, सचिब नरेश बोगटीको सहभागिता रहेको थियो ।
कार्तिक १७ गते जाजरकोट रामीडाँडा केन्द्रविन्दु भएर गएको भुकम्पका कारण जाजरकोट र रूकुम पश्चिम लगायतका क्षेत्रमा ठूलो जनधनको क्षति भएको थियो ।