कञ्चनपुर,
कञ्चनपुरको बेलडाँडी गाउँपालिकाकी उपाध्यक्ष शान्ति नाथ ज्यान सम्बन्धी गम्भीर आरोपमा पक्राउ परेकी छन्।

नाथविरुद्ध परेको जाहेरीका आधारमा उनलाई नियन्त्रणमा लिई जिल्ला प्रहरी कार्यालय कञ्चनपुरले अनुसन्धान अघि बढाएको जनाएको छ।
मृतक हरकिशन रानाकी पत्नी फिरिया देवी रानाले दिएको जाहेरीमा नाथमाथि योजनाबद्ध रूपमा धम्की दिने, आर्थिक लेनदेनमा दबाब सिर्जना गर्ने तथा ज्यान मार्ने षड्यन्त्र गरेको आरोप लगाइएको छ। जाहेरीअनुसार कृषि अनुदान दिलाउने बहानामा मृतकसँग ठूलो रकम असुल गर्ने प्रयास गरिएको र रकम नदिएपछि धम्की दिइएको उल्लेख छ ।
पीडित परिवारका अनुसार करिब ४० लाख रुपैयाँको अनुदान प्रक्रियामा संलग्न गराएर मृतकबाट झण्डै ४७–४८ लाख रुपैयाँ खर्च गराइएको थियो। पछि थप रकम माग गरिएपछि विवाद बढेको दाबी गरिएको छ।

गत वैशाख ९ गते बेलौरी नगरपालिका–१० शिवनगरस्थित निर्मल आर्यघाट नजिक हरकिशन रानाको शव जलेको अवस्थामा फेला परेको थियो। घटनास्थलमा मोटरसाइकल पनि जलेको अवस्थामा भेटिएको थियो। परिवारले घटनालाई सुनियोजित हत्या भएको दाबी गरेको छ।
प्रहरीले घटनासम्बन्धी सर्जमिन मुचुल्का, पोस्टमार्टम प्रतिवेदन लगायतका प्रमाण संकलन गरी अनुसन्धान अघि बढाएको जनाएको छ। साथै, चेक प्रकरणमा अन्य व्यक्तिको संलग्नता हुनसक्ने आशंकामा थप अनुसन्धान भइरहेको प्रहरीले जनाएको छ।