बैतडी । बैतडीमा शुक्रबार भएको बस दुर्घटनामा परी भुमेश्वर माध्यमिक विद्यालय ठाँडका शिक्षक विरेन्द्रबहादुर चन्दको निधन भएको छ। दशरथचन्द नगरपालिका–६ सिमायल निवासी ३५ वर्षीय चन्दको दुर्घटनास्थलमै मृत्यु भएको प्रहरीले जनाएको छ।
धनगढीबाट बैतडी सदरमुकामतर्फ जाँदै गरेको सुदूरपश्चिम यातायातको सुपप्र ०१–००१ ख ३६४६ नम्बरको बस शुक्रबार साँझ पाटन नगरपालिका–४ शाहीलेक नजिक दुर्घटनामा परेको थियो। भुमेश्वर मावि ठाँडमा कार्यरत चन्द विद्यालयबाट घर फर्किने क्रममा बसमा सवार थिए।
विद्यालयका प्रधानाध्यापक लक्ष्मीदत्त भट्टका अनुसार विज्ञान शिक्षकका रूपमा कार्यरत चन्द २०७२ सालदेखि विद्यालयमा अध्यापनरत थिए। उनले विद्यालयको प्रधानाध्यापकको जिम्मेवारीसमेत सम्हालिसकेका थिए। उनको असामयिक निधनले विद्यालय तथा समग्र शैक्षिक क्षेत्रमा अपूरणीय क्षति पुगेको भट्टले बताए।
शिक्षक चन्दको निधनपछि विद्यालय परिवार, विद्यार्थी तथा उनको गृहगाउँ सिमायल शोकमा डुबेको छ। शुक्रबार दिनभर विद्यालयमा अध्यापनमा व्यस्त रहेका उनी साँझ घर फर्किने क्रममा दुर्घटनामा परेका थिए।
दुर्घटनामा अन्य १० जना घाइते भएका थिए। घाइतेमध्ये ९ जना उपचारपछि घर फर्किसकेका छन् भने एक जनाको धनगढीस्थित अस्पतालमा उपचार भइरहेको जिल्ला प्रहरी कार्यालय बैतडीले जनाएको छ।
प्रहरीका अनुसार पाटन नगरपालिका–८ निवासी ३७ वर्षीय केशवसिंह महराले चलाएको बस अनियन्त्रित भई दुर्घटना भएको हो। चालकलाई नियन्त्रणमा लिएर घटनाबारे थप अनुसन्धान भइरहेको प्रहरीले जनाएको छ।
