जेठ २२, सिलगढी/ देशमा हाल उपल्लो वायुमण्डलमा रहेको पश्चिमी न्यून चापीय रेखा (ट्रफ) तथा स्थानीय वायुको आंशिक प्रभाव कायम रहेकाले विभिन्न क्षेत्रमा बदली, वर्षा र चट्याङको सम्भावना रहेको छ।
जल तथा मौसम पूर्वानुमान महाशाखाका अनुसार अहिले कोशी, मधेस, बागमती र सुदूरपश्चिम प्रदेशसहित अधिकांश हिमाली तथा पहाडी भूभागमा साधारणतया बदली रहेको छ भने तराईका अधिकांश क्षेत्रमा मौसम मुख्यतया सफा रहेको छ। कोशी, बागमती, गण्डकी, लुम्बिनी, कर्णाली तथा सुदूरपश्चिम प्रदेशका केही स्थानमा हल्कादेखि मध्यम वर्षा भइरहेको छ।
आज दिउँसो सुदूरपश्चिम, लुम्बिनी र कर्णाली प्रदेशका केही स्थानमा तथा देशका अन्य हिमाली र पहाडी भूभागका एक–दुई स्थानमा मेघगर्जन र चट्याङसहित मध्यम वर्षाको सम्भावना रहेको महाशाखाले जनाएको छ। मधेस, कोशी, बागमती र गण्डकी प्रदेशका तराई क्षेत्रका केही स्थानमा पनि वर्षा हुन सक्ने अनुमान गरिएको छ।
यता सुदूरपश्चिम प्रदेशका तराई क्षेत्रसहित कोशी, बागमती र गण्डकी प्रदेशका केही तराई भूभागमा गर्मी बढ्ने सम्भावना रहेको छ। मधेस र लुम्बिनी प्रदेशका तराई क्षेत्रमा मध्यम तातो लहरको प्रभाव देखिन सक्ने मौसमविद्हरूले बताएका छन्।
आज राति कोशी प्रदेशसहित देशका हिमाली क्षेत्रमा साधारणतया बदली रहनेछ भने पहाडी क्षेत्रमा आंशिक बदली रहने पूर्वानुमान गरिएको छ। कोशी प्रदेशका केही स्थान तथा बागमती, गण्डकी, लुम्बिनी, कर्णाली र मधेस प्रदेशका हिमाली तथा पहाडी भूभागका एक–दुई स्थानमा हल्का वर्षा वा हिमपात हुन सक्ने सम्भावना रहेको छ।
महाशाखाले तातो लहर र बढ्दो गर्मीबाट बच्न आवश्यक सावधानी अपनाउन आग्रह गरेको छ। दिउँसोको समयमा अनावश्यक रूपमा घाममा ननिस्कन, प्रशस्त पानी तथा झोल पदार्थ सेवन गर्न, हल्का कपडा लगाउन र बाहिर निस्कँदा छाता वा टोपी प्रयोग गर्न सुझाव दिइएको छ।
