सिलगढी/ नेपालमा हाल उपल्लो वायुमण्डलमा रहेको पश्चिमी न्यून चापीय रेखा तथा स्थानीय वायुको प्रभाव कायम रहेकाले देशका विभिन्न क्षेत्रमा मौसम बदली हुने क्रम जारी रहेको छ।
जल तथा मौसम पूर्वानुमान महाशाखाका अनुसार अहिले कोशी र सुदूरपश्चिम प्रदेशसहित देशका अधिकांश हिमाली तथा पहाडी भूभागमा साधारणतया बादल लागेको छ भने बाँकी क्षेत्रमा आंशिक बदली रहेको छ। कोशी प्रदेशका केही स्थानमा चट्याङसहित हल्कादेखि मध्यम वर्षा भइरहेको छ।
आज दिउँसो देशका हिमाली तथा पहाडी भूभागमा सामान्य बदली रहनेछ भने तराई क्षेत्रमा आंशिक बदली रहने पूर्वानुमान गरिएको छ। हिमाली तथा पहाडी भूभागका केही स्थानमा मेघगर्जन र चट्याङसहित मध्यम वर्षा हुन सक्ने महाशाखाले जनाएको छ। साथै लुम्बिनी र सुदूरपश्चिम प्रदेशका तराईका एक–दुई स्थानमा पनि वर्षाको सम्भावना रहेको छ।
यता मधेश प्रदेश तथा कोशी प्रदेशको तराई क्षेत्रमा भने तातो दिनको अवस्था कायम रहने सम्भावना रहेको मौसमविद्हरूले बताएका छन्।
आज राति हिमाली क्षेत्रमा सामान्य बदली, पहाडी क्षेत्रमा आंशिक बदली तथा तराई क्षेत्रमा मौसम मुख्यतया सफा रहने अनुमान गरिएको छ। कोशी, कर्णाली र सुदूरपश्चिम प्रदेशका हिमाली तथा पहाडी भूभागका एक–दुई स्थानमा हल्का वर्षा हुन सक्ने सम्भावना रहेको छ। बागमती, गण्डकी र लुम्बिनी प्रदेशका उच्च हिमाली क्षेत्रमा पनि हल्का वर्षाको सम्भावना रहेको महाशाखाले जनाएको छ।
मौसममा आउने परिवर्तनलाई ध्यानमा राखी आवश्यक सतर्कता अपनाउन महाशाखाले सर्वसाधारणलाई आग्रह गरेको छ।
