अछाम । अछामको पञ्चदेवल विनायक नगरपालिकामा जिप दुर्घटना हुँदा दुई जनाको मृत्यु भएको छ भने अन्य तीन जना घाइते भएका छन्।
शुक्रबार मध्यपहाडी लोकमार्गअन्तर्गत पञ्चदेवल विनायक नगरपालिका–४ क्षेत्रमा दार्चुलाबाट जुम्लातर्फ जाँदै गरेको बाप्र ०१–०२७ च २२७७ नम्बरको जिप दुर्घटनामा परेको प्रहरीले जनाएको छ।
दुर्घटनामा गम्भीर घाइते भएका मकवानपुरको हेटौंडा उपमहानगरपालिका–४१ वर्षीय नविन तुलाधर र बर्दियाको बाँसगढी नगरपालिका–५ का ४५ वर्षीय रामप्रकाश थारुको उपचारका क्रममा मृत्यु भएको सुदूरपश्चिम प्रदेश ट्राफिक प्रहरी कार्यालयले जनाएको छ। दुवै जनाको शनिबार बिहान सुर्खेत प्रादेशिक अस्पतालमा उपचारका क्रममा निधन भएको हो।
दुर्घटनामा चालक बाँकेको नेपालगञ्ज उपमहानगरपालिका–५ का २८ वर्षीय राजेन्द्र भिमराज चट्टान गुप्ता र सिराहाको कल्याणपुर नगरपालिका–१० का २७ वर्षीय सन्तकुमार शाह गम्भीर घाइते भएका छन्। उनीहरूको सुर्खेतमै उपचार भइरहेको छ।
त्यस्तै, स्याङ्जाको फेदीखोला नगरपालिका–४ का अर्जुनकुमार पौडेल घाइते भएका छन्। उनको अवस्था मध्यम रहेको प्रहरीले जनाएको छ।
प्रहरीका अनुसार जिप सडकबाट करिब २०० मिटर तल खसेको थियो। दुर्घटनाको कारणबारे अनुसन्धान भइरहेको छ।
