सिलगढी/ देशमा पश्चिमी वायु, स्थानीय वायु तथा नेपालको पूर्वी भूभाग नजिक रहेको न्यूनचापीय क्षेत्रको प्रभाव कायम रहेकाले आज पनि विभिन्न प्रदेशमा वर्षा, चट्याङ र हावाहुरीको सम्भावना रहेको मौसम पूर्वानुमान महाशाखाले जनाएको छ।

महाशाखाका अनुसार हाल देशभर सामान्यदेखि आंशिक बदली रहेको छ। आज दिउँसो कोशी, बागमती र गण्डकी प्रदेशमा सामान्य बदली रहनेछ भने मधेशसहित अन्य प्रदेशका पहाडी तथा हिमाली भूभागमा आंशिक बदली रहने अनुमान गरिएको छ। तराईका अधिकांश क्षेत्रमा मौसम मुख्यतया सफा रहनेछ ।

कोशी, बागमती र गण्डकी प्रदेशका पहाडी तथा हिमाली क्षेत्रमा मेघगर्जन र चट्याङसहित मध्यम वर्षाको सम्भावना रहेको छ। साथै मधेश प्रदेशका केही तराई क्षेत्र तथा लुम्बिनी, कर्णाली र सुदूरपश्चिमका पहाडी भूभागका एक–दुई स्थानमा पनि वर्षा हुन सक्ने मौसमविद्ले बताएका छन्।

मधेश र कोशी प्रदेशका तराई क्षेत्रमा हावाहुरी चल्ने सम्भावना रहेको छ भने सुदूरपश्चिम र लुम्बिनी प्रदेशमा अत्यधिक गर्मी बढ्ने संकेत देखिएको छ। विशेषगरी कैलाली, कञ्चनपुर, डोटी, बाँके, बर्दिया र दाङ जिल्लामा तातो हावा अर्थात् ‘लु’ चल्न सक्ने भएकाले सतर्कता अपनाउन महाशाखाले आग्रह गरेको छ।

आज राति पनि कोशी प्रदेशसहित हिमाली क्षेत्रमा बदली रहने र कोशी, बागमती तथा गण्डकी प्रदेशका केही स्थानमा चट्याङसहित वर्षा हुन सक्ने पूर्वानुमान गरिएको छ।