दार्चुला , मदिरा सेवन गरी वडा कार्यालयमा पुगेर कर्मचारीहरूमाथि अभद्र तथा अश्लील व्यवहार गरेको आरोपमा दार्चुलामा एक युवक पक्राउ परेका छन्।

पक्राउ पर्नेमा नौगाड गाउँपालिका–१ ईयरकोटका रोशन ठगुन्ना रहेको जिल्ला प्रहरी कार्यालय दार्चुलाले जनाएको छ।

जिल्ला प्रहरी कार्यालय दार्चुलाका प्रमुख प्रहरी नायब उपरीक्षक (डीएसपी) गौरव महतका अनुसार ठगुन्नालाई आइतबार पक्राउ गरी अनुसन्धानका लागि जिल्ला सदरमुकाम ल्याइएको हो। वडा कार्यालयमा मदिरा सेवन गरी अभद्र व्यवहार गरेको भिडियो सामाजिक सञ्जालमा सार्वजनिक भएपछि उनलाई पक्राउ गरिएको प्रहरीले जनाएको छ।
प्रहरीका अनुसार गत शुक्रबार ठगुन्नाले वडा कार्यालयमा सामाजिक परिचालकका रूपमा कार्यरत कलावती ठगुन्नासँग विवाद गरेका थिए। कलावतीले ठगुन्ना मदिरा सेवन गरी आफ्नै छोरालाई कुटपिट गरिरहेको देखेपछि रोक्न खोज्दा विवाद भएको बताइएको छ।

त्यसपछि ठगुन्ना वडा कार्यालयमा प्रवेश गरी सामाजिक परिचालक कलावती ठगुन्ना, कार्यालय सहयोगी दानसिंह ठगुन्नालगायत कर्मचारीसँग विवाद गर्दै अभद्र व्यवहार गरेको प्रहरीको भनाइ छ।
घटनाको भिडियो सामाजिक सञ्जालमा सार्वजनिक भएपछि प्रहरीले घटनाबारे अनुसन्धान अघि बढाएको हो। घटना शुक्रबार भए पनि भिडियो सार्वजनिक भएपछि मात्रै घटना बाहिर आएको प्रहरीले जनाएको छ।

प्रहरीले ठगुन्नालाई नियन्त्रणमा लिए पनि हालसम्म किटानी जाहेरी प्राप्त नभएको जनाएको छ। किटानी जाहेरी प्राप्त भएपछि कानुनी प्रक्रियाअनुसार थप अनुसन्धान अघि बढाइने प्रहरीको भनाइ छ।
यता, स्थानीयस्तरमा भने मदिरा सेवनका क्रममा घटना भएकाले कानुनी कारबाही अघि बढाउनुको सट्टा आपसी समझदारीमा घटना मिलाउनुपर्ने आवाजसमेत उठेको बताइएको छ। यद्यपि घटनाबारे प्रहरीले आवश्यक कानुनी प्रक्रिया पूरा गरेर अनुसन्धान अघि बढाउने जनाएको छ।