धनगढी, नेपाली सेनामा जागिर लगाइदिने प्रलोभन देखाएर ठगी गरेको आरोपमा कञ्चनपुरका एक व्यक्ति पक्राउ परेका छन्। पक्राउ पर्नेमा बेलौरी नगरपालिका–८, कलकत्ता घर भएका हरिश चन्द रहेका छन्।
कैलाली प्रहरीले चन्द लामो समयदेखि आफूलाई नेपाली सेनाको कर्मचारीका रूपमा चिनाउँदै जागिर लगाइदिने भन्दै विभिन्न व्यक्तिबाट रकम असुल्दै आएको प्रारम्भिक अनुसन्धानबाट खुलेको जनाएको छ।
बिहीबार इलाका प्रहरी कार्यालय चिसापानीकी प्रहरी निरीक्षक मीरा खड्काको नेतृत्वमा खटिएको टोलीले चन्दलाई पक्राउ गरेको हो। पछिल्लो पटक उनी दैलेखका दुर्गेश थापालाई नेपाली सेनामा जागिर लगाइदिने भन्दै ठगी गरेको आरोपमा पक्राउ परेका हुन्।

प्रहरीका अनुसार चन्दले थापाका भिनाजुमार्फत सम्पर्क गरी नेपाली सेनामा तालिमसमेत नगरी जागिर लगाइदिने आश्वासन दिएका थिए। त्यसपछि थापालाई कोहलपुरबाट कैलाली ल्याएर चिसापानीस्थित गोरुङ्गे ब्यारेकमा तालिमबिना नै जागिर लगाइदिने बताएका थिए।

थापासँगै चिसापानीस्थित एक होटलमा बसेका चन्द केही समयपछि सम्पर्कविहीन भएका थिए। आफू ठगीमा परेको थाहा पाएपछि थापाले इलाका प्रहरी कार्यालय चिसापानीमा जानकारी गराएका थिए।
प्रहरीका अनुसार त्यसपछि धनगढीमा बस्दै आएका चन्दलाई साथीभाइमार्फत फकाएर चिसापानी बोलाई पक्राउ गरिएको हो ।

अनुसन्धानका क्रममा चन्दले कैलालीको घोडाघोडीकी सुनिता चौधरीलाई समेत नेपाली सेनामा जागिर लगाइदिने भन्दै ठगी गरेको खुलेको प्रहरीले जनाएको छ। चौधरीको उमेर २४ वर्ष पुगिसकेको र नेपाली सेनामा भर्नाका लागि उमेरका कारण योग्य नभए पनि चन्दले आफूले मिलाएर जागिर लगाइदिने भन्दै उनीबाट २ लाख ५० हजार रुपैयाँ लिएको प्रहरीको भनाइ छ।

प्रहरीका अनुसार गत असार ११ गते धनगढीस्थित मालपोत कार्यालयनजिकै चौधरी र चन्दबीच रकम लेनदेन भएको थियो। चौधरीको चिया–नास्ता पसलमा नियमित चिया पिउन जाने चन्दले आफूलाई ‘आफ्नै मान्छे’ भन्दै विश्वासमा पारी रकम लिएको बताइएको छ।

प्रहरीले चन्द नेपाली सेनामा कार्यरत नरहेको पुष्टि भएको जनाएको छ। उनी यसअघि पनि यस्तै प्रकृतिको ठगीमा संलग्न रहेको हुन सक्ने प्रहरीको आशंका छ।

जिल्ला प्रहरी कार्यालय कैलालीले चन्दबाट ठगीमा परेका अन्य व्यक्ति भए प्रहरीको सम्पर्कमा आउन आग्रह गरेको छ। चन्दविरुद्ध ठगीसम्बन्धी कसुरमा अदालतबाट म्याद थप गरी प्रहरीले थप अनुसन्धान अघि बढाइरहेको जनाएको छ।