सिलगढी / जल तथा मौसम विज्ञान विभाग ले आज देशका विभिन्न स्थानमा मेघगर्जन, चट्याङ र हावाहुरीसहित भारी वर्षा हुने प्रक्षेपण गरेको छ।
मौसम पूर्वानुमान महाशाखाका अनुसार अहिले देशभर सामान्यदेखि घना बादल लागेको छ भने धेरैजसो क्षेत्रमा वर्षा तथा हिमपातको सम्भावना रहेको छ। विशेषगरी सुदूरपश्चिम र कर्णाली प्रदेशका एक–दुई स्थानमा मेघगर्जन र चट्याङसहित भारी वर्षा हुन सक्ने जनाएको छ।

लुम्बिनी प्रदेशसहित देशका पहाडी तथा हिमाली भू–भागका केही स्थानमा असिनासहित वर्षा र हिमपात हुने सम्भावना छ। त्यस्तै तराईका केही क्षेत्रमा तीव्र गतिको हावाहुरी चल्ने अनुमान गरिएको छ।
आज राति पनि मौसममा खासै सुधार नआउने जनाइएको छ। गण्डकी, लुम्बिनी, कर्णाली र सुदूरपश्चिम प्रदेशका केही स्थानमा वर्षा जारी रहने र लुम्बिनी प्रदेशका एक–दुई स्थानमा भारी वर्षा हुन सक्ने सम्भावना रहेको छ।

हावाहुरी, चट्याङ र भारी वर्षाले जनजीवन तथा यातायात प्रभावित हुन सक्ने भएकाले सतर्क रहन विभागले सबैलाई आग्रह गरेको छ। पहाडी क्षेत्रमा हिमपात र तराई क्षेत्रमा हावाहुरीको जोखिम रहेकाले आवश्यक सावधानी अपनाउन सुझाव दिइएको छ।