सिलगढी
सुदूरपश्चिम प्रदेश सरकारले दुई जिल्ला अस्पतालमा नयाँ अध्यक्ष नियुक्त गरेको छ। आज बसेको मन्त्रिपरिषद् बैठकले डोटी र अछाम जिल्ला अस्पतालका लागि अध्यक्ष चयन गर्ने निर्णय गरेको हो।
निर्णयअनुसार डोटी जिल्ला अस्पतालको अध्यक्षमा भरत बोहरा र अछाम जिल्ला अस्पतालको अध्यक्षमा लीलाराज केसी नियुक्त भएका छन्।
त्यसैगरी प्रदेश खेलकुद परिषद्का सदस्यहरू पनि मनोनयन गरिएको छ। कञ्चनपुरका लीला बोहरा र काशीराम बोहरा तथा बैतडीका पूर्णबहादुर टेरलाई सदस्यमा नियुक्त गरिएको छ।
बैठकले मुख्यमन्त्री तथा मन्त्रिपरिषद्को पारिश्रमिक तथा सुविधा सम्बन्धी ऐन, २०७५ को अनुसूची संशोधन गर्ने निर्णय समेत गरेको छ। साथै, सुदूरपश्चिम प्रदेश स्थानीय सेवा गठन तथा सञ्चालन सम्बन्धी नियमावलीलाई पनि स्वीकृति दिइएको छ।
स्वकीय सचिवालयका कर्मचारीहरूको पारिश्रमिक र सुविधा सम्बन्धी विषयमा पनि निर्णय गरिएको छ। यस्तै, प्रदेश सभा पदाधिकारी तथा सदस्यहरूको सुविधा सम्बन्धी ऐन, २०७५ को अनुसूची–२ मा समेत हेरफेर गरिएको छ।
यसका अतिरिक्त, बाजुराको हिमाली गाउँपालिकामा अस्थायी प्रहरी चौकी भवन निर्माण कार्यक्रमलाई सशर्त अनुदानमार्फत स्थानीय तहलाई हस्तान्तरण गर्ने निर्णय गरिएको छ।
प्रदेश सरकारले सवारी साधन खरिद तथा प्रयोग सम्बन्धी निर्देशिका पारित गर्नुका साथै वित्तीय हस्तान्तरणसम्बन्धी व्यवस्था र सुदूरपश्चिम जनता आवास कार्यक्रमको कार्यविधि पनि स्वीकृत गरेको जनाएको छ।
