बाजुरा
बाजुराको स्वामीकार्तिक गाउँपालिका–२ पुडेनीमा ढुंगा प्रहार गरी एक युवकको हत्या गरिएको छ। स्थानीय ३५ वर्षीय सर्वाश बुढाको टाउकोमा ढुंगा प्रहार गर्दा घटनास्थलमै मृत्यु भएको प्रहरीले जनाएको छ।
प्रदेश प्रहरी कार्यालय धनगढीका प्रवक्ता प्रहरी वरिष्ठ उपरीक्षक पदमबहादुर विष्टका अनुसार स्थानीय धनबहादुर महतरा र उनका छोरा हेमराज महतराले कुटपिट गर्दै बुढामाथि ढुंगा प्रहार गरेका थिए। घटनापछि बुढाको घटनास्थलमै ज्यान गएको बताइएको छ।
घटनाबारे वडा अध्यक्ष विष्णुबहादुर बुढाले प्रहरीलाई जानकारी गराएपछि इलाका प्रहरी कार्यालय मुक्तिकोटबाट प्रहरी नायब निरीक्षक रविन्द्र धामीको नेतृत्वमा टोली घटनास्थलतर्फ खटिएको थियो। प्रहरी टोलीले घटनामा संलग्न धनबहादुर महतरालाई नियन्त्रणमा लिएको छ भने कुटपिटमा संलग्न उनका छोरा हेमराज महतरा फरार रहेका छन्।
फरार अभियुक्तको खोजी कार्य भइरहेको र घटनाबारे थप अनुसन्धान जारी रहेको प्रहरीले जनाएको छ।
