कैलाली,
कैलालीको धनगढी उपमहानगरपालिका–१५ कनरी क्षेत्रबाट भन्सार छली गरेर भारतबाट ल्याइएका सामानसहित दुई जना पक्राउ परेका छन्। प्रहरीले करिब ६० हजार ९ सय रुपैयाँ बराबरका हाडवेयर लगायतका सामान र से ५ प २६२३ नम्बरको मोटरसाइकलसहित उनीहरूलाई नियन्त्रणमा लिएको जनाएको छ।
पक्राउ पर्नेमा कैलारी गाउँपालिका–५ का २८ वर्षीय खडकबीर चौधरी र भजनी नगरपालिका–९ का ३७ वर्षीय रामनारायण चौधरी रहेका छन्। उनीहरू मोटरसाइकलमा भारतबाट सामान ल्याउँदै गरेको अवस्थामा फेला परेका थिए।
बिहीबार दिउँसो प्रहरी चौकी कनरीबाट खटिएको गस्ती टोलीले चेकजाँच गर्ने क्रममा मोटरसाइकलसहित सामान बरामद गर्दै दुवै जनालाई नियन्त्रणमा लिएको हो। प्रहरीले बरामद सामान र मोटरसाइकल आवश्यक कारबाहीका लागि सम्बन्धित निकायमा बुझाउने तयारी भइरहेको जनाएको छ।
