सिलगढी — फागुन १९ गते मङ्गलबार साँझ नेपालका विभिन्न भागबाट खण्डग्रास चन्द्रग्रहण देखिने भएको छ। चन्द्रमा उदाउँदासाथ नै ग्रहण लागेको अवस्थामा देखिने भएकाले यो दृश्य दुर्लभ मानिएको छ।
वरिष्ठ खगोलविद् जयन्त आचार्यका अनुसार काठमाडौंमा साँझ ६:०४ बजे चन्द्रमाको उदय हुनेछ। उदाउँदै गर्दा चन्द्रमाको आधाभन्दा बढी भाग पृथ्वीको कालो छायाले ढाकिएको हुनेछ। काठमाडौंबाट यो खगोलीय घटना करिब एक घण्टासम्म स्पष्ट रूपमा अवलोकन गर्न सकिने र साँझ ७:०४ बजेपछि चन्द्रमा क्रमशः पृथ्वीको मुख्य छायाबाट बाहिर निस्कन सुरु गर्ने बताइएको छ।
उहाँका अनुसार चन्द्रग्रहण हेर्न कुनै विशेष उपकरण वा सुरक्षात्मक चस्माको आवश्यकता पर्दैन। सूर्यग्रहण जस्तो आँखामा असर नपर्ने भएकाले खुला आकाश भएको स्थानबाट नाङ्गो आँखाले सुरक्षित रूपमा अवलोकन गर्न सकिन्छ।
नेपालबाट यसपछिको उल्लेखनीय ग्रहण घटना विसं २०८४ मा मात्र खण्डग्रास सूर्यग्रहणका रूपमा देखिने जानकारी दिइएको छ।
