सिलगढी । सुदूरपश्चिम प्रदेश सरकारले परम्परागत भुवापर्वको अवसरमा पुष ४ गते (शुक्रबार) प्रदेशभर सार्वजनिक बिदा दिने निर्णय गरेको छ।
प्रदेश सरकारको आन्तरिक मामिला तथा कानुन मन्त्रालयले प्रदेश राजपत्रमार्फत सूचना जारी गर्दै भुवापर्वका कारण उक्त दिन सार्वजनिक बिदा लागू हुने जनाएको हो।
भुवापर्व सुदूरपश्चिमका डोटी, अछाम, बझाङ र बाजुरा जिल्लामा विशेष महत्वका साथ मनाइन्छ। संस्कृतिविद् माधवप्रसाद जोशीका अनुसार यस पर्वमा महाभारतकालीन युद्धकथा, पाण्डव–कौरवका गाथालाई गीत र नाचमार्फत प्रस्तुत गर्ने परम्परा रहेको छ।
प्रदेशका विभिन्न ठाउँमा स्थानीय संस्कारअनुसार भुवापर्व फरक–फरक ढंगले मनाइने गरिन्छ। पर्वको क्रममा रातभर आगो बाल्दै देउडा खेल्ने, युद्धकला झल्किने नृत्य प्रस्तुत गर्ने चलन रहेको छ। कतिपय स्थानमा भुवापर्वलाई ‘भस्सो’ नामले पनि चिनिन्छ।
यस अवसरमा पुरुषहरूले ढाल र तरवारसहित युद्धकला प्रदर्शन गर्ने गर्छन् भने केही गाउँहरूमा बाघ, चित्तल र हरिण जस्ता जनावरका मुकुट लगाएर नाच्ने प्रचलन पनि देखिन्छ।
भुवापर्व प्रायः तीनदेखि पाँच दिनसम्म मनाइने परम्परा रहेको छ।
