कैलाली/कञ्चनपुर । सुदूरपश्चिम प्रदेशका विभिन्न स्थानमा प्रहरीले लागूऔषधविरुद्धको अभियान तीव्र बनाउँदै खैरो हेरोइन र चरेशसहित ६ जनालाई पक्राउ गरेको छ।
कैलालीको जानकी गाउँपालिका–५ घर भई हाल लम्कीचुहा नगरपालिका–३ व्यवस्थितनगरमा डेरा गरी बस्दै आएका २८ वर्षीय सुनिल कुमार चौधरी लागूऔषधसहित पक्राउ परेका छन्। चौधरीको कोठामा गरिएको खानतलासीका क्रममा ८ ग्राम ५८० मिलिग्राम खैरो हेरोइन फेला परेको प्रहरीले जनाएको छ। उनलाई इलाका प्रहरी कार्यालय लम्की र लागूऔषध नियन्त्रण ब्युरो शाखा कार्यालय धनगढीबाट संयुक्त रूपमा खटिएको टोलीले नियन्त्रणमा लिएको हो।
यस्तै, कञ्चनपुरको दोधारा–चाँदनी नगरपालिका–१ हल्दुघाटमा गोप्य सूचनाका आधारमा खटिएको प्रहरीले ७२ वर्षीय चन्द्र चन्दलाई चरेशसहित पक्राउ गरेको छ। उनले सञ्चालन गरेको पसलमा खानतलासी गर्दा लुकाइछिपाइ राखिएको अवस्थामा १८ ग्राम ८१० मिलिग्राम चरेश फेला परेको प्रहरीले जनाएको छ।
यसैगरी कञ्चनपुरकै लालझाडी गाउँपालिका–२ कञ्जबाट २८ वर्षीय छोट राम डगौरालाई २६० मिलिग्राम खैरो हेरोइनसहित आइतबार पक्राउ गरिएको छ। उनलाई इलाका प्रहरी कार्यालय बेलौरी र लागूऔषध नियन्त्रण ब्युरो शाखा कार्यालय धनगढीबाट खटिएको संयुक्त टोलीले नियन्त्रणमा लिएको हो।
त्यसैदिन पुनर्वास नगरपालिका–५ दोदापुल क्षेत्रमा सवारी चेकजाँचका क्रममा खैरो हेरोइनसहित थप तीन जना पक्राउ परेका छन्। बेलौरीबाट धनगढीतर्फ जाँदै गरेको सुदूरपश्चिम प्रदेश ०२–००१ ह १९५० नम्बरको अटो जाँच गर्दा अटो चालक पुनर्वास नगरपालिका–१० का २२ वर्षीय रोसन सिंह साउद, अटोमा सवार पुनर्वास नगरपालिका–११ का २० वर्षीय कैलाश खत्री र धनगढी उपमहानगरपालिका–२ का १८ वर्षीय किशोर खैरो हेरोइनसहित फेला परेका हुन्। उनीहरूको साथबाट १५० मिलिग्राम खैरो हेरोइन बरामद गरिएको प्रहरीले जनाएको छ।
सबै घटनाका सम्बन्धमा प्रहरीले थप अनुसन्धान अघि बढाएको छ।
