सिलगढी /बंगालको खाडीमा विकसित भएको न्यून चापीय प्रणाली भारतको ओडिसाबाट मध्य भारत हुँदै नेपाल प्रवेश गर्ने क्रममा रहेकाले आगामी असोज १७ देखि २० गतेसम्म देशका विभिन्न प्रदेशमा मनसुनी गतिविधि तीव्र हुने भएको छ।
जल तथा मौसम विज्ञान विभागका अनुसार यस प्रणालीको प्रभाव विशेषगरी कोशी, मधेश, बागमती, गण्डकी र लुम्बिनी प्रदेशमा बढी देखिनेछ। विभागले नारायणी, बागमती, कमला र कोशीसहितका नदीहरू तथा तिनका सहायक नदीहरूको बहाव उल्लेख्य रूपमा बढ्न सक्ने र खतरा तह आसपास पुग्न सक्ने चेतावनी दिएको छ।
त्यस्तै महाभारत र चुरे भेगबाट बग्ने स–साना नदी–नालामा पनि आकस्मिक बहाव हुने सम्भावना रहेको विभागले जनाएको छ।
विशेष जोखिम हुने क्षेत्रका रूपमा बागमती प्रदेशको काठमाडौं उपत्यका, काभ्रे, सिन्धुपाल्चोक, रसुवा, मकवानपुर र चितवन; कोशी प्रदेशको संखुवासभा, ताप्लेजुङ, इलाम, झापा, मोरङ; र मधेश प्रदेशको वारा, पर्सा, सर्लाही, रौतहटलाई औंल्याइएको छ।
हाल नेपालमा मनसुन पूर्णरूपमा बाहिरिन बाँकी रहेको र वर्षा अझै जारी रहने विभागले जनाएको छ। विभागले मौसम र वर्षाको अवस्थाबारे अद्यावधिक जानकारी आफ्नो वेबसाइट, सामाजिक सञ्जाल, टोल–फ्री सेवा ११५५ र एसमेस मार्फत उपलब्ध गराइरहेको छ।
यसैबीच, विभागले आमसर्वसाधारणलाई सतर्क रहन र विपद् जोखिम न्यूनीकरण तथा व्यवस्थापनसँग सम्बन्धित निकायहरूलाई बाढी, डुबान, पहिरो, भूक्षय र यातायात अवरुद्ध हुने सम्भावित जोखिमलाई ध्यानमा राखी आवश्यक पूर्वतयारी गर्न विशेष आग्रह गरेको छ।
