कञ्चनपुर, बेलडाँडी — कञ्चनपुरको बेलडाँडी गाउँपालिका–२ सिहपाल टोलमा एक युवती झुन्डिएको अवस्थामा मृत फेला परेकी छन्। मृतक १८ वर्षीया सम्झना भट्ट आइतबार बिहान आफ्नै घरभित्र झ्याल ढोकामा चुकुन लगाएर झुन्डिएको अवस्थामा फेला परेको जिल्ला प्रहरी कार्यालय कञ्चनपुरले जनाएको छ।

सम्झनाको शरीरमा चोटपटकको घाउ देखिएकाले घटना शंकास्पद भएको प्रहरीको भनाइ छ। यसै सन्दर्भमा उहाँका श्रीमान् पवन भट्टलाई नियन्त्रणमा लिई सोधपुछ भइरहेको प्रहरी नायब उपरीक्षक (डीएसपी) सागर बोहराले जानकारी दिनुभयो।

सम्झना र पवनबीच गत फागुन महिनामा प्रेम विवाह भएको थियो। मृतकका बुबा भोजराज भट्टका अनुसार पवनले छोरीलाई पटक–पटक मानसिक र शारीरिक यातना दिने गर्थे। शनिबार मात्रै घरायसी झगडाका कारण इलाका प्रहरी कार्यालय बेलडाँडीमा उजुरी दिइएको थियो। प्रहरीले दुबैलाई सम्झाई–बुझाई गरेर घर फर्काएको थियो।

एलबीई कक्षा १२ मा अध्ययनरत सम्झनाको असमायिक निधनपछि भट्ट परिवार शोकमा डुबेको छ। बुबा भोजराज भट्टले छोरीको मृत्यु शंकास्पद भएको भन्दै निष्पक्ष छानबिन र दोषीमाथि कडा कारबाहीको माग गर्नुभएको छ। प्रहरीले घटनाको अनुसन्धान अघि बढाएको जनाएको छ।