दार्चुला, साउन ४ — दार्चुलाका सबै नौ वटै स्थानीय तहले आगामी १० वर्षलाई लक्षित गरी गाउँ शिक्षा योजना निर्माण गरेका छन्। संघीय सरकारको शिक्षा, विज्ञान तथा प्रविधि मन्त्रालय तथा शिक्षा तथा मानवस्रोत विकास केन्द्रको निर्देशनमा आर्थिक वर्ष २०८१/८२ मा योजना तयार गरिएको हो। योजना आव २०९०/९१ सम्म लागू हुने छ।

यो योजनाको उद्देश्य तोकिएको उमेर समूहका सबै बालबालिकाको सर्वाङ्गीण विकास, प्रारम्भिक बालविकास सेवामा पहुँच विस्तार, गुणस्तरीय पूर्वशिक्षा, र बालमैत्री भौतिक पूर्वाधारको विकास गरी सबै बालबालिकालाई कक्षा १ मा भर्ना गराउनु रहेको दुहुँ गाउँपालिकाका शिक्षा शाखा प्रमुख लोकेन्द्रबहादुर बमले जानकारी दिनुभयो।

दार्चुलाका दुई नगरपालिका र छ गाउँपालिकाले उक्त योजना केन्द्रको ढाँचामा निर्माण गरिसकेका छन्। मार्मा गाउँपालिकाले पनि योजना निर्माणको अन्तिम चरणमा रहेको गाउँपालिकाका शिक्षा अधिकृत राजेन्द्रप्रसाद जोशीले बताउनुभयो।

शिक्षा विकास तथा समन्वय एकाइ, दार्चुलाका प्रमुख जयराज पन्तका अनुसार, स्थानीय तह स्वायत्त भएकाले योजना निर्माण र कार्यान्वयनको दायित्व पनि उनीहरूकै हो। “पाँचबर्से अद्यावधिक योजना र १० बर्से योजना नीति, कार्यक्रम र बजेटमा समेटिनु जरुरी छ,” उहाँले भन्नुभयो।

योजना कार्यान्वयनपश्चात् गुणस्तरीय प्रारम्भिक शिक्षा, बालबालिकाको पहुँच र सहभागिता सुनिश्चित हुने अपेक्षा गरिएको छ। **विश्व खाद्य कार्यक्रम (WFP)ले योजना निर्माणमा आर्थिक तथा प्राविधिक सहयोग प्रदान गरेको हो।