कैलाली /धनगढीमा १२ वर्षपछिको सबैभन्दा ठूलो वर्षा भएको छ। महाकाली बेसिन फिल्ड कार्यालय अत्तरियाका अनुसार २०७० साउन ४ गतेपछि २०८२ असार १६ गते पहिलो पटक २४ घण्टामा २१२ मिलिमिटर वर्षा रेकर्ड गरिएको हो।
वेसिन कार्यालयका प्रमुख सञ्जयकुमार साहका अनुसार २०६० सालयता चारपटक धनगढीमा ठूलो वर्षा भएको छ। “२०६० भदौ २ गते २६५ मिलिमिटर, २०६६ भदौ २ गते २६९.४ मिलिमिटर, र २०७० साउन ४ गते २९०.९ मिलिमिटर वर्षा भएको थियो,” प्रमुख साहले बताए। उहाँका अनुसार यसपटक १२ वर्षपछि फेरि असार १६ गते २१२ मिलिमिटर पानी परेको छ।
महाकाली बेसिन फिल्ड कार्यालयले यो तथ्याङ्क २४ घण्टाको वर्षालाई आधार बनाएर रेकर्ड गरेको जनाएको छ। कार्यालयका अनुसार २०६० पछि ६ वर्षमै २०६६ मा ठूलो वर्षा भएको र त्यसपछि ४ वर्षपछि २०७० मा पुनः ठूलो वर्षा भएको थियो। तर यसपटक भने झण्डै १२ वर्षपछि मनसुन सुरु भएलगत्तै धनगढी र आसपासका क्षेत्रमा भारी वर्षा भएको कार्यालयले जनाएको छ।
