कञ्चनपुर /शुक्लाफाँटा नगरपालिका–१० स्थित सनवोरा नदीमा बाँस प्रयोग गरी तीन सय मिटर क्षेत्रमा जैविक तटबन्ध निर्माण गरिएको छ। मनसुन सक्रिय भएसँगै खेलमैदान, नयाँ कभर्ड हल र नदी किनारका बस्तीलाई संरक्षण गर्ने उद्देश्यले यो कार्य अघि बढाइएको नगरपालिकाको पूर्वाधार विकास शाखा प्रमुख दीपक धामीले जानकारी दिनुभयो।
प्रधानमन्त्री रोजगार कार्यक्रमअन्तर्गत सूचीकृत भई एक सय दिनको रोजगारीका लागि छनोट भएका स्थानीय बासिन्दाहरूलाई परिचालन गरेर बाँस गाडी, बाँसकै छेस्का बुनेर जैविक तटबन्ध निर्माण गरिएको शाखा प्रमुख धामीले बताउनुभयो। दक्ष कामदार, मेसिनरीको भाडा, इन्धन खर्च र बाँस खरिदलगायतका लागि नगरपालिका बजेटबाट पाँच लाख रुपैयाँ खर्च भएको छ।
धामीका अनुसार जैविक तटबन्ध निर्माणपछि खेलमैदान र कभर्ड हल क्षेत्रको जग्गा भूक्षयबाट सुरक्षित हुने विश्वास छ। साथै, नदी किनारकै खल्ला बस्तीका बासिन्दालाई पनि बाढीको जोखिमबाट जोगाउन मद्दत पुग्ने उहाँको भनाइ छ। “बाँसको जैविक तटबन्ध उपयोगी, वातावरणमैत्री र कम लागतमा बन्ने भएकाले कटान रोक्न र नदी किनारको प्राकृतिक पुनःस्थापना गर्न उपयुक्त हुन्छ,” धामीले बताउनुभयो।
नगरपालिकाले जैविक तटबन्ध निर्माणसँगै नदी किनारका क्षेत्रमा बोट बिरुवा र घाँसपात रोप्ने तयारी गरेको पनि उहाँले जानकारी दिनुभयो। “घाँस र बोटबिरुवाको जराले माटो बाँधेर राख्ने भएकाले भूक्षय नियन्त्रणमा मद्दत पुग्छ,” धामीले भन्नुभयो।
यसैबीच, भूक्षयको उच्च जोखिममा रहेका ठाउँमा जलस्रोत तथा सिँचाइ विभागको रु १५ लाखको लागतमा ९० मिटर क्षेत्रफलमा तारजाली र ढुङ्गाको तटबन्ध पनि निर्माण गरिएको छ।
