कैलाली — कैलालीको लम्कीचुहा नगरपालिका–१ मा एक वृद्ध मृत अवस्थामा फेला परेका छन्।
बुधबार साँझ करिब ५ः३० बजे ८० वर्षीय नयाँराम जैशी आफ्नै नातामा पर्ने ५५ वर्षीय बर्मा भण्डारीको आगनमा लडेको अवस्थामा मृत भेटिएका हुन्।
जिल्ला प्रहरी कार्यालय कैलालीका प्रवक्ता प्रहरी नायब उपरीक्षक (डीएसपी) राजकुमार सिंहका अनुसार मृतकको शरीरमा बाहिरी चोटपटक देखिएको छैन। तर मामा–भान्जाबीच आर्थिक लेनदेनसम्बन्धी विवाद रहेको सूचनाका आधारमा अनुसन्धान अघि बढाइएको छ।
सोही क्रममा भण्डारीलाई इलाका प्रहरी कार्यालय लम्कीले नियन्त्रणमा लिएको छ। जैशीको शव भने हालसम्म घटनास्थलमै रहेको छ। उनका छोरा काठमाडौँबाट आइरहेका भएकाले शव नउठाइएको प्रहरीले जनाएको छ।
डीएसपी सिंहले घटनाबारे थप अनुसन्धान भइरहेको जानकारी दिएका छन्।
