बाजुरा / सरकारले नेपाली नागरिकताको विकल्पका रूपमा अघि सारेको राष्ट्रिय परिचयपत्र बनाउने कार्यमा ढिलाइ हुँदा जिल्ला प्रशासन कार्यालय बाजुरामा नागरिकको घुइँचो बढेको छ।
स्थानीय प्रशासनका अनुसार पछिल्ला केही दिनदेखि कार्यालयको नेटवर्कमा समस्या आएपछि सेवा अवरुद्ध हुँदै आएको छ। सेवा लिने नागरिकहरू दिनौं लाइन बस्न बाध्य भएका छन्। चार दिनदेखि सेवा नपाएको गुनासो गर्दै स्थानीय प्रेम विकले भने, “मार्तडीमै बसेर तीन दिनदेखि लाइनमा बसिरहेको छु, अझै काम भएको छैन।”
विभिन्न सरकारी कामकाजका लागि राष्ट्रिय परिचयपत्र अनिवार्य बनाइएकोले आवेदन दिनेको संख्या बढ्दो छ। यद्यपि, नेटवर्क अवरोधले सेवा नियमित रूपमा सञ्चालन नहुँदा सेवाग्राही हैरान भएका छन्।
राष्ट्रिय परिचयपत्र दर्ता अपरेटर जेविस ऐडीका अनुसार, “डाटा सङ्कलनको काममा बायोमेट्रिक विवरण (आँखा, कान, हस्ताक्षर) अनिवार्य भएकाले पनि प्रक्रियामा समय लाग्ने गरेको छ।”
बाजुरामा राष्ट्रिय परिचयपत्रका लागि आवेदन प्रक्रिया २०७७ साल असोज ११ गते सुरु भएको थियो। मतदाता सङ्ख्याको आधारमा हालसम्म ७४ प्रतिशत नागरिकको विवरण सङ्कलन भइसकेको छ।
जिल्ला प्रशासन कार्यालय बाजुराका प्रमुख जिल्ला अधिकारी मेघनाथ पाध्याले भने, “सेवाग्राहीको चाप बढेकाले छिटो र प्रभावकारी सेवा दिन हामी प्रतिबद्ध छौं। तर देशभर नै नेटवर्क समस्या आएकोले केही ढिलाइ भएको हो।”
स्थानीयहरूले सेवा प्रवाह प्रभावकारी बनाउन प्रविधिगत समस्या चाँडो समाधान गर्न सरकारसँग आग्रह गरेका छन्। “परिचयपत्र नबनाए सरकारी सेवा लिन नसकिने अवस्था आएको छ, राज्यले यसप्रति गम्भीर ध्यान दिनुपर्छ,” एक सेवाग्राहीले भने।
