डोटी — डोटीको बोगटान फुड्सिल गाउँपालिकाले “समृद्ध बोगटान” अभियानअन्तर्गत शुक्रबार एक भव्य समारोहका बीच मातृभूमि महोत्सव सम्पन्न गरेको छ।
गाउँपालिका–५ स्थित खत्याडी माध्यमिक विद्यालय, चमरा चौतारामा आयोजित महोत्सवको उद्घाटन पालिका अध्यक्ष कमल बहादुर गड्सिलाले गरेका थिए। उनले महोत्सवले देश–विदेशमा रहेका बोगटानवासीलाई भावनात्मक रूपमा जोड्ने विश्वास व्यक्त गर्दै समृद्धिका लागि कला, संस्कृति, पर्यटन र उत्पादन क्षेत्रलाई जोड्नुपर्ने आवश्यकता औंल्याए।
कार्यक्रममा विभिन्न वक्ताहरूले बोगटान फुड्सिलको मौलिकता, सांस्कृतिक धरोहर र विकासका सम्भावनाहरूमा विचार राखेका थिए। विशेष अतिथिका रूपमा सहभागी मदन पुरस्कार विजेता लेखक रामलाल जोशीले स्थानीय पहिचान र संस्कृतिको संरक्षणमा जोड दिँदै आफ्ना कृतिमा बोगटानको माटोको सुगन्ध पाइने अनुभव सुनाए।
चर्चित गायक तथा लेखक यज्ञराज उपाध्यायले हराउँदै गएको लोकसंस्कृति र संस्कारप्रति चिन्ता व्यक्त गर्दै विद्यार्थीस्तरमै परम्पराको शिक्षा आवश्यक रहेको बताए।
विद्यार्थीलाई साहित्यिक सामग्री वितरण
त्यस्तै महाेत्सवकाे अवसरमा पालिकाले कक्षा ६ माथिका करिब १,३०० विद्यार्थीलाई ‘बाआमा’ आख्यान र सबै विद्यालयलाई ‘काली कर्णालीको लोक साहित्य तथा संस्कृति’ पुस्तक वितरण गरेको छ।
साथै, अन्तर्राष्ट्रिय स्तरमा बोगटानको नाम चिनाएका क्रिकेटर लोकेश बमलाई नगद १ लाख रुपैयाँसहित सम्मान गरिएको छ।
कार्यक्रममा पालिकाभित्रका सबै विद्यालयका शिक्षक, विद्यार्थी, अभिभावक, स्थानीय प्रतिनिधि र विभिन्न क्षेत्रका व्यक्तिहरूको उपस्थिति थियो। विद्यार्थीहरूले विभिन्न सांस्कृतिक प्रस्तुति समेत दिएका थिए।
