बाजुरा / बाजुराको जगन्नाथ गाउँपालिका–२ काडाकोटमा जिप दुर्घटनामा परेर ३ जनाको मृत्यु भएको छ भने २ जना गम्भीर घाइते भएका छन्।
मृत्यु हुनेमा नेपाल टेलिकम बाजुरा शाखा कार्यालयका प्रमुख ४८ वर्षीय लोक बहादुर खड्का, ५७ वर्षीय चालक करन सिंह महतरा, र ३५ वर्षीय सुरक्षा गार्ड रविन्द्र धामी रहेका छन्। खड्का कैलालीको धनगढी उपमहानगरपालिका–५ का स्थायी बासिन्दा हुन् भने चालक महतरा कञ्चनपुरको कृष्णपुर नगरपालिका–२ निवासी हुन्। धामी बाजुराको बडिमालिका नगरपालिका–७ ढम्कनेका हुन्।
घाइते हुनेमा बाजुराको बुढिनन्दा नगरपालिका–२ कोल्टी निवासी अन्दाजी २५ वर्षीय नन्द तिरूवा र २२ वर्षीय लोकेन्द्र तिरूवा रहेका छन्। दुवै जनालाई उपचारका लागि कोल्टी अस्पताल ल्याइँदैछ।
“वा ५ च २२०९” नम्बरको उक्त जिप पिलुचौरबाट काँडाकोटस्थित नेपाल टेलिकमको टावरमा ब्याट्री जोड्न गइरहेको थियो। यही क्रममा जिप दुर्घटनामा परेको जनाइएको छ।
प्रहरी र स्थानीयबासीको सहयोगमा उद्दार कार्य सम्पन्न गरिएको छ। दुर्घटनाबारे थप अनुसन्धान भइरहेको छ।
