कैलाली — कैलालीको घोडाघोडी नगरपालिका–३, निम्दीमा मोटरसाइकलको ठक्करबाट एक पैदल यात्रीको मृत्यु भएको छ।
सुदूरपश्चिम प्रदेश ०१–००९ प ८४५२ नम्बरको मोटरसाइकलले सोमवार साँझ ठक्कर दिँदा सोही ठाउँका ५५ वर्षीय मानबहादुर चौधरी गम्भीर घाइते भएका थिए। उपचारका लागि घोडाघोडी अस्पताल, सुखड लगिएकोमा राति ८:४५ बजे उनको मृत्यु भएको जिल्ला प्रहरी कार्यालय कैलालीले जनाएको छ।
दुर्घटनामा मोटरसाइकल चालक घोडाघोडी नगरपालिका–७ का २५ वर्षीय भरतबहादुर बम पनि घाइते भएका छन्। उनको उपचार सोही अस्पतालमा भइरहेको छ।
प्रहरीले मोटरसाइकल र पछाडि सवार २४ वर्षीय लक्ष्मणबहादुर सिमलालाई नियन्त्रणमा लिई आवश्यक अनुसन्धान थालेको जनाएको छ।
