धनगढी, कैलाली — भारतबाट भन्सार छली गरी ल्याइएका अवैध सामानसहित कैलालीका दुई स्थानबाट चार जना महिलालाई प्रहरीले पक्राउ गरेको छ। केही स्थानबाट भने अवैध सामान वेवारिसे अवस्थामा बरामद गरिएको छ।
कैलालीको धनगढी उपमहानगरपालिका–८ स्थित धनगढी गाउँबाट प्रहरीले ८० हजार ८५० रुपैयाँ बराबरको चिनी, बिडी, सुर्ती, चियापत्ती, कुर्ती सेट, कट्टु, टप्स आदि सामानसहित २७ वर्षीया दिपिका चौधरी र ३४ वर्षीया हस्मिता चौधरीलाई पक्राउ गरेको हो।
त्यस्तै, धनगढी उपमहानगरपालिका–१३ स्थित राजपुर चोकबाट भन्सार छली गरी ल्याइएका एक लाख ४० हजार ७५० रुपैयाँ बराबरका चिनी, दाल, कुर्ता सुरुवाल, कट्टु, वानपिस, प्लास्टिक झिल्लीसहित गोदावरी नगरपालिका–१ की ५८ वर्षीया पार्वती पन्त र ४० वर्षीया ईश्वरी बुढालाई पनि प्रहरीले नियन्त्रणमा लिएको छ।
सोमवार दिउँसो टीकापुर नगरपालिका–७ स्थित भ्युटावर नजिकैबाट प्रहरी चौकी कालाकुण्डाको गस्ती टोलीले ३७ हजार ६८५ रुपैयाँ बराबरका आयुर्वेदिक तथा भिटामिन औषधी वेवारिसे अवस्थामा फेला पारी नियन्त्रणमा लिएको छ।
यसैगरी, कञ्चनपुरको भीमदत्त नगरपालिका–२, दोधारा चाँदनी नगरपालिका–१ को फोर लाइन सडक किनारा, पट्टरखल्ला क्षेत्र र लालझाडी गाउँपालिका–१ नौरंगा सिद्दबाबा सामुदायिक वन नजिकबाट प्रहरीले तीन लाख ८८ हजार ७१० रुपैयाँ बराबरका भन्सार छली गरिएका सामान बरामद गरेको छ।
बरामद भएका सामानमा चिनी, खाने तेल, सुटपिस, कुर्ती, पाइन्ट, लेहँगा, इनभर्टर, बोइलर कुखुरा लगायत रहेका छन्। यी सबै सामग्री जिल्ला प्रहरी कार्यालय कञ्चनपुर तथा मातहत प्रहरी इकाइहरूको गस्ती टोलीले नियन्त्रणमा लिएको हो।
