कैलाली /कैलालीका विभिन्न स्थानहरूबाट भन्सार छलि गरी अवैध रूपमा ओसारपसार गरिएका सामग्री र पशुहरू प्रहरीले नियन्त्रणमा लिएको छ। जिल्ला प्रहरी कार्यालय कैलाली मातहतको गस्ती टोलीले बेवारिसे अवस्थामा यी वस्तुहरू फेला पारी आवश्यक अनुसन्धानका लागि प्रक्रिया अघि बढाएको छ।
धनगढी उपमहानगरपालिका–२ स्थित माछापोखरी, पुरानो भन्सार रोड र भजनी नगरपालिका–७ हिम्मतपुरबाट भारतबाट भन्सार छलि गरि ल्याइएको अनुमानित एक लाख ८४ हजार दुई सय रुपैयाँ बराबरको पेय पदार्थ, बिडी, सुर्ती, मोबाइल कभर, बोइलर कुखुरा लगायतका सामग्री बरामद गरिएको छ।
त्यसैगरी, खेदा घाटबाट भारत लैजाँदै गरेका १ बोका, १ खसी र ४ वटा बाख्रा, जसको मूल्य करिब एक लाख १० हजार रुपैयाँ अनुमान गरिएको छ, धनगढी उपमहानगरपालिका–१९ स्थित नेपालबाट भारततर्फ भन्सार छलि गरी लैजाँदै गरेको अवस्थामा इलाका प्रहरी कार्यालय बहुलियाबाट खटिएको गस्ती टोलीले नियन्त्रणमा लिएको छ।
दुवै घटनामा संलग्न व्यक्तिहरूको पहिचान र अनुसन्धान कार्य जारी रहेको प्रहरीले जनाएको छ।
