सिलगढी — पश्चिमी वायु, स्थानीय प्रणाली र बङ्गालको खाडीबाट भित्रिएको जलवाष्पयुक्त हावाले देशभरको मौसममा फेरबदल ल्याएको छ। जल तथा मौसम विज्ञान विभागका अनुसार हाल देशका पहाडी भू-भागमा सामान्य बदली छ भने अन्य क्षेत्रहरू आंशिक बदलीदेखि सफा देखिएका छन्।
सुदूरपश्चिम र कर्णाली प्रदेशका केही भागमा अहिले नै मेघगर्जन, चट्याङसहित हल्का वर्षा भइरहेको छ। दिनभर यस्तो अवस्था जारी रहने पूर्वानुमान गरिएको छ।
आज सोमबार विशेषगरी कोशी प्रदेशसहित पहाडी भेगहरूमा मेघगर्जन र चट्याङसहित हल्कादेखि मध्यम वर्षा हुने सम्भावना छ। हिमाली क्षेत्रका केही स्थानमा हल्का हिमपात पनि हुन सक्नेछ।
रातिको मौसम पनि दिनको जस्तै रहनेछ। पूर्वका कोशीदेखि पश्चिमका कर्णालीसम्मका पहाडी क्षेत्रमा मौसम सक्रिय रहने छ भने हिमाली भेगहरूमा चिसो थपिनसक्ने सम्भावना छ।
विभागले यस्तो अवस्था जनजीवन, कृषि, स्वास्थ्य, तथा यातायात क्षेत्रमा असर पार्न सक्ने भएकाले सतर्कता अपनाउन आग्रह गरेको छ।
