बैतडी, वैशाख ११ – बैतडीका स्थानीय तहहरूले नागरिकता प्रमाणपत्रका लागि अनलाइन सिफारिस दिने कार्य सुरु गरेका छन्। जिल्लाका १० मध्ये ६ स्थानीय तहमा अहिले अनलाइनमार्फत नागरिकता सिफारिसको सेवा सुरु गरिएको प्रमुख जिल्ला अधिकारी दीर्घराज उपाध्यायले जानकारी दिएका छन्।
उनका अनुसार शिवनाथ र पञ्चेश्वर गाउँपालिका, मेलौली, पाटन, दशरथचन्द र पुर्चौडी नगरपालिका अनलाइन प्रणालीमार्फत सिफारिस सेवा दिन थालेका हुन्।
प्रजिअ उपाध्यायका अनुसार यो व्यवस्था सुरु भएपछि वडाबाटै अनलाइन सिफारिस दिइने भएको छ, जसले गर्दा सेवाग्राहीलाई आवश्यक कागजात अभावमा जिल्ला प्रशासन कार्यालय पुगेर खाली हात फर्किनुपर्ने समस्या हटेको छ।
पुर्चौडी नगरपालिकाका प्रमुख प्रशासकीय अधिकृत जगदीशप्रसाद जोशीले अनलाइन प्रणालीले अभिलेखीकरण सजिलो बनाउनुका साथै सेवा प्रवाहमा छरितोपना ल्याएको बताए। “अब सेवाग्राहीले सबै कागज तयार गरेर मात्रै प्रशासन कार्यालय जान सक्छन्,” उनले भने।
शिवनाथ गाउँपालिका अध्यक्ष कर्णसिंह साउँदले वडाबाटै आवश्यक कागज पुग्यो वा भएन भन्ने थाहा हुने भएकाले सेवा लिन आउँदा सेवाग्राहीलाई निकै सहज भएको बताए।
बाँकी स्थानीय तहहरूमा पनि चाँडै अनलाइन सेवा सुरु हुने जनाइएको छ। केही वडाहरूमा इन्टरनेट पहुँच र आवश्यक कर्मचारी अभावका कारण ढिलाइ भएको भए पनि, शीघ्र कर्मचारी अभिमुखीकरणमार्फत सेवा विस्तार गरिने जिल्ला प्रशासन कार्यालयले जनाएको छ।
प्रशासन कार्यालयका अनुसार अनलाइन प्रणालीले झुटा वा कीर्ते विवरणमार्फत नागरिकता लिने सम्भावना रोक्नेछ, साथै सेवा प्रवाहमा पारदर्शिता र विश्वसनीयता पनि बढ्नेछ।
