डोटी, वैशाख ५ – डोटी जिल्लाको बडिकेदार गाउँपालिका–२ बर्छेनस्थित डाँडामा सिकार खेल्ने क्रममा भरुवा बन्दुक पड्किँदा एक युवकको ज्यान गएको छ। मृत्यु हुनेमा साेही ठाउँ बर्छेनका २४ वर्षीय नरेश सार्की रहेकाे जिल्ला प्रहरी कार्यालय डाेटीले जनाएको छ ।
बिहिबार राति करिब ८ बजे जंगलमा सिकार खेल्न गएका नरेश सार्कीको भरुवा बन्दुक पड्किँदा बडिकेदार गाउँपालिका–१ स्थित बेडुपाटा खोलाको किनारमा घटनास्थलमै मृत्यु भएको प्रहरी चौकी खड्यौली, डोटीले जनाएको छ।
प्रहरीकाे प्रारम्भिक अनुसन्धान अनुसार साेही ठाउँ रजेडाका बासिन्दा ४८ वर्षीय कमल सिंह खड्काले बोकेको भरुवा बन्दुकको बट रुखमा ठोक्किँदा बन्दुक पड्किएको र गोली नरेश सार्कीको दायाँ छातिमा लागेर ज्यान गएको पुष्टि भएको छ।
प्रहरीले घटनासँग सम्बन्धित रहेकामा शंका लागेका १० जनालाई नियन्त्रणमा लिएको छ। उनीहरूमा पक्राउ पर्नेमा कमल सिंह खड्कासहित खेम खड्का, तारा सिंह खड्का, तेजेन्द्र भाट, अमर शाह, चक्र भाट, सुनिल बम, गणेश ब. घर्ती मगर, मान ब. शाह र जुलेश नामजाली मगर रहेका छन्।
आज बिहान ३ बजेदेखि घटनाको विस्तृत अनुसन्धान भइरहेको प्रहरीले जनाएको छ।
