काठमाडौं – राजधानीको तिनकुने क्षेत्रमा शुक्रबार भएको राजावादी प्रदर्शन हिंसात्मक बनेको छ। निषेधित क्षेत्र तोड्न खोजेपछि प्रदर्शनकारी र सुरक्षाकर्मीबीच झडप भएको हो।
प्रदर्शनका क्रममा राजावादी समूहले प्रहरीमाथि ढुंगामुढा प्रहार गरेपछि प्रहरीले लाठीचार्ज, पानीको फोहोरा, र अश्रुग्यास प्रयोग गरेको थियो। अवस्था नियन्त्रणमा नआएपछि प्रहरीले रबरका गोलीसमेत प्रहार गरेको छ।
झडपमा प्रहरीको गोली लागेर एक प्रदर्शनकारी घाइते भएका छन्, जसलाई उपचारका लागि कान्तिपुर अस्पताल लगिएको छ। सुरक्षाकर्मीहरू पनि घाइते भएका छन् भने उनीहरूको उपचार जारी छ।
झडपका क्रममा प्रदर्शनकारीहरूबाट दर्जनौँ घाइते भएका छन्। केही घरमा तोडफोड भएको छ भने एक घरमा आगलागीसमेत भएको छ, तर आगलागीको कारण खुलेको छैन।
उक्त प्रदर्शन नवराज सुवेदी नेतृत्वको राजावादी मोर्चा र दुर्गा प्रसाई नेतृत्वको समूहद्वारा संयुक्त रूपमा आयोजना गरिएको थियो। शान्तिपूर्ण हुने भनिएको प्रदर्शन हिंसात्मक बनेपछि तिनकुने क्षेत्रमा तनाव कायमै छ, जसका कारण शीर्ष नेताहरूको सम्बोधन कार्यक्रम पनि बिथोलिएको छ।
