सोल, दक्षिण कोरिया – दक्षिण कोरियाको जंगलमा फैलिएको भीषण आगलागी बस्तीसम्म पुग्दा कम्तीमा २७ जनाको मृत्यु भएको छ। गृह मन्त्रालयका अनुसार घटनामा ३२ जना घाइते भएका छन् भने हजारौँ मानिस विस्थापित भएका छन्।
स्थानीय अधिकारीहरूका अनुसार मृतकमध्ये धेरैजसो ६० र ७० वर्ष उमेरका रहेका छन्। आगलागीले कयौँ ऐतिहासिक स्थलहरूलाई पनि क्षति पुर्याएको छ।
१३०० वर्ष पुरानो बौद्ध मन्दिर नष्ट
यस डढेलोमा परेर १३०० वर्ष पुरानो बौद्ध मन्दिर जलेर नष्ट भएको छ। दक्षिणपूर्वी जंगलमा मार्च २१ मा सुरु भएको आगलागी अहिलेसम्म नियन्त्रणमा आउन सकेको छैन।
३५,००० हेक्टर क्षेत्र ध्वस्त, हेलिकप्टर दुर्घटनाग्रस्त
यस डढेलोले एक हप्ताभित्र ३५,००० हेक्टरभन्दा बढी क्षेत्र नष्ट गरिसकेको छ। हुरी र सुख्खाको कारण आगो तीव्र गतिमा फैलिएको छ, जसले आगो निभाउने प्रयासलाई झन् कठिन बनाएको छ। मंगलबार, आगलागी नियन्त्रण गर्ने क्रममा एउटा हेलिकप्टर दुर्घटनाग्रस्त भएको अधिकारीहरूले जनाएका छन्।
अहिलेसम्म आगलागी नियन्त्रणका लागि व्यापक उद्धार प्रयास जारी छ, तर प्रतिकूल मौसमका कारण समस्या भइरहेको छ।
