सिलगढी / सुदूरपश्चिमका पहाडी जिल्लामा डेङ्गुकाे सङ्क्रमण बढ्न थालेकाे छ ।
सुदूरपश्चिम प्रदेश स्वास्थ्य निर्देशनालयका अनुसार लामखुट्टेको टोकाइका कारण तराई क्षेत्रमा देखिने डेङ्गु रोगको सङ्क्रमण पछिल्लो समय पहाडी जिल्लामा देखिन थालेकाे छ ।
निर्देशनालयका अनुसार गत माघ यता सुदूरपश्चिममा एक सय ४० जनामा डेङ्गुको सङ्क्रमण देखि सकेका छन् । जसमध्ये पहाडी जिल्लामा सबैभन्दा बढी डोटी जिल्लामा ४७ जना सङ्क्रमित फेला परेका छन् ।
निर्देशनालयको तथ्याङ्कअनुसार अछाममा २६, कञ्चनपुरमा २४, बाजुरामा १५, दार्चुलामा १०, कैलालीमा नौ, बझाङमा चार, डडेल्धुरामा तीन र बैतडीमा दुईजनामा सङ्क्रमण देखिएको छ।
स्थानीय तहले लामखुट्टेको लार्भा भएका ठाउँको पहिचान गरी ‘खोप र नष्ट गर’ सञ्चालन गरिरहेका छन् । निर्देशनालयका अनुसार सन् २०२३ मा सुदूरपश्चिममा एक हजार एक सय ९४ जनामा डेङ्गु सङ्क्रमण देखिनाका साथै चारजनाको मृत्यु भएको थियो।
