धनगढी ।सुदूरपश्चिम प्रदेश सरकार संकटमा परेको छ ।
केन्द्रमा नेपाली कांग्रेस–माओवादीको गठबन्धन भत्किएर गठबन्धन फेरिनासाथ सुदुरपश्चिम सरकार संकटमा गरकाे हाे ।
वि स २०७९ माघ २६ गते मुख्यमन्त्रीमा नियुक्त भएका कमल बहादुर शाह नेतृत्वको सरकार संकटमा परेसँगै नयाँ सरकार गठनबारे चाैतर्फी चर्चा चलेकाे छ। नयाँ समीकरण अनुसार माओवादी, एमाले र नागरिक उन्मुक्ति पार्टीबिच सहकार्य गरेर सरकार गठन गर्नु पर्ने भएकाे छ । प्रदेशसभामा नेकपा एमालेबाट तत्कालीन मुख्यमन्त्री राजेन्द्र सिंह रावलले विश्वासको मत लिन नसक्दा सबैभन्दा ठुलो दलको हैसियतले नेपाली कांग्रेसका कमलबहादुर शाह संविधानको धारा १६८ को उपधारा ३ बमोजिम मुख्यमन्त्री बनेका थिए ।
बहुमतका लागि अब सुदुरपश्चिममा सरकार गठन गर्न कम्तीमा २७ जना सांसदको समर्थन आवश्यक हुन्छ । अहिले सुदुरपश्चिमा नेपाली कांग्रेसका १८, माओवादी केन्द्रका सभामुखसहित ११, नेकपा एमालेका १०, नागरिक उन्मुक्ति पार्टीका ७, एकीकृत समाजवादीका ४, राप्रपाका १ र १ जना स्वतन्त्र सांसद गरी ५३ सदस्यीय सुदूरपश्चिम प्रदेशसभामा हाल ५२ सदस्य छन् । अब सुदूरपश्चिममा सरकार गठनका लागि नागरिक उन्मुक्ति पार्टी निर्णायक देखिएको छ ।
नयाँ समीकरण अनुसार माओवादीको ११, एमालेको १० र नागरिक उन्मुक्तिको ७ गरी २८ जना सांसदको समर्थन जुट्छ ।
अर्कोतिर कांग्रेस, नागरिक उन्मुक्ति र नेकपा एकीकृत समाजवादी मिलेर पनि सरकार गठन गर्ने आधार देखिन्छ । कांग्रेसको १८, नागरिक उन्मुक्तिको ७ र एकीकृत समाजवादीको ४ गरी २९ सांसदको समर्थन जुट्छ ।
