सिलगढी,
जिल्ला अस्पताल डोटीले हाल नियमित प्रवाह भइरहेको विषेशज्ञ सेवा भन्दा अबदेखि प्रत्येक महिनाकाे दुई दिन थप विषेशज्ञ सेवा प्रवाह गर्ने भएकाे छ ।
अस्पतालका अनुसार सेवाग्राहीलाई थप गुणस्तरीय सेवा प्रदान गर्न अव प्रत्येक महिनाको पहिलो र तेस्रो शुक्रवार थप विशेषज्ञ सेवा प्रदान गरिने भएकाे हाे ।
जिल्ला अस्पताल डाेटीका मेडिकल सुपरिटेन्डेन्ट डा. सुजित कुमार मण्डलका अनुसार अस्पतालले निरन्तर विशेषज्ञ सेवाभन्दा थप महिला तथा प्रसुती राेग सेवा, हाडजोर्नी विषेशज्ञ सेवा,जनरल सर्जन सेवा प्रदान गरीने बताउनु भयाे ।
अस्पतालकाे दैनिक सेवाले बिरामीको उपचारमा सम्भव नभएपछि बिरामीलाई रेफर गर्नुपर्ने बाध्यता हटाउन जिल्ला अस्पताल डडेल्धुरा र जिल्ला अस्पताल डाेटीकाे संयुक्त आयाेजनामा उक्त थप विषेशज्ञ सेवा प्रदान गरिने डा. मण्डलले बताउनु भएकाे छ ।
सेवाग्राहीकाे स्वास्थ्यलाई मुख्य प्राथमिकतामा राख्दै सेवा भाेली शुक्रवारबाट नै सञ्चालन हुनेभएको छ । भाेलि जनरल सर्जन डाक्टरद्वरा सेवा दिइने मण्डलले बताउनु भएकाे छ । उक्त विषेशज्ञ डाक्टरद्वारा पत्थरीको चेकजाँच, हाइड्रोशील, हर्नियाँ, बाबासिर, कलेजोको समस्या, फिस्टुला, पायल्स, फिसर तथा शरीरका विभिन्न अङ्गमा रहेका गाँठा गुठीको उपचार गरिने भएकाे छ ।
यस्तै बिरामीहरू नआएमा आगामी दिनमा अगाडि नै सबैलाई जानकारी गराइ बिरामी जम्मा गरी सेवा प्रदान गर्ने व्यवस्था मिलाउने डाक्टर मण्डलले बताउनु भयाे ।
यस्तै चैत्र महिनाको पहिलो शुक्रवार महिला तथा प्रसूति रोग विशेषज्ञ डाक्टरबाट सेवा दिइने भएको छ ।
