सिलगढी / आलु खेति गर्ने किसानहरूलाई कृषि ज्ञान केन्द्र डोटीले ‘डढुवा’ रोगबाट बच्न अनुरोध गरेको छ ।

जिल्ला भित्र विभिन्न कलष्टरहरुमा आलु खेती भएको र कलष्टरमा गरिएको आलू खेतिमा हाल मौसम परिवर्तन भइरेहको हुदा, आलुमा डढुवा रोग लाग्ने सम्भावना हुने भएकाले त्यसकाे रोकथाम गर्न आलु खेति गर्ने कृषकहरुलाई सूचनामनर्फत अनुरोध गरिएकाे छ ।

प्रकाशित सुचना अनुसार १० देखी २० डिग्री सेल्सियस तापक्रम, ८० देखी ९० प्रतिशत आद्रता र दिउसो बादल र कुहिरो लागेमा आलु खेतीमा डढुवा राेग लाग्न सक्ने हुन्छ ।  छिनछिनमा पानी पर्नु, रातमा अत्यधिक मात्रामा शीत पर्नु र हल्का हावा चल्नु पनि डढुवा रोगको लागि अनुकूल वातावरण रहेकाे जानकारी दिएकाे छ ।

डढुवाको लागि अनुकूल वातावरण भएमा डाइथेन एम–४५ को धुलो २ दशमलव ५ ग्राम प्रति लिटर पानीमा मिसाइ ७ दिनको फरकमा पात भिज्ने गरी छर्ने गर्नु पर्दछ । तर रोग देखिन थालेपछि क्रीनोक्सिल, रिडोमिल, कपर अक्सिक्लोराइड १ दशमलव ५ ग्राम प्रति लिटर पानीमा मिसाई ७ दिनको फरकमा पात भिज्ने गरी छर्ने र डाइमिथोमोर्फ वा सेक्टीन २ ग्राम प्रति लिटर पानीमा मिसाई ७ दिनको फरकमा पातको तलपट्टिको भाग भिज्ने गरी छर्नुपर्दछ ।

अबको समय डढुवा रोगको लागि मौसम अनुकूल हुने भएकाले कृषकहरूले समयमै सजगता अपनाउनुपर्ने कृषि ज्ञान केन्द्र डोटीका निमित्त प्रमुख गङ्गा दत्त अवस्थीले बताए ।