गणेश मौनी / डोटीमा पहिलो पटक व्यवसायी रूपमा फुल खेतीको सुरुवात गरिएको छ । डोटीको शिखर नगरपालिका ८ का एक युवाले फुल खेतीलाई व्यवसायी रूपमा सुरुवात गरेका छन् ।
नयाँ सोचविचारका साथ समाजमा युवाहरूले नयाँ काम गरेर देखाउनु पर्छ भन्ने हेतुले फुल खेतीको सुरुवात गरेको फुल खेती व्यवसायी लोकेश रावलले बताउनु भयो । जिल्लामा पहिलो पटक फुल खेतीको सुरुवात गरेका रावलले चितवनबाट ८ सय बोट सयपत्री टेनिस बल जातको फुल ल्याई खेती सुरु गरेका छन् । दसैँ तिहारलाई लक्षित गरेर पहिलो पटक फुल खेतीको सुरुवात गरेको रावलले बताए ।
शिखर नगरपालिका ८ तिनतालीमा एक रोपनीमा फुल खेती सुरुवात गरेका रावल आगामी वर्षहरूमा क्षेत्रफल बढाउनुका साथै अन्य नयाँ नयाँ बालीहरूको खेती गर्ने सोच रहेको बताए । उनले भने म कृषि क्षेत्रमा नितान्त रूपमा सिकारु छु, युवाहरूले आफ्नो ठाउँमा केही गर्नुपर्छ भन्ने सोच छ केही नयाँ काम गर्नेछु युवाहरूले नै नयाँ व्यवसायको सुरुवात गर्नुपर्छ ।
कास्की पोखरामा बिबिए पढेर नेटवर्किङमा काम गरिरहेका रावलको लागि फुल खेती व्यवसाय नयाँ भएपनी भारतीय बजारमा रहेका कृत्रिम फुलका माला र नेपाली बजारमा रहेका खादाँहरुलाई विस्थापित गर्न फुल खेती आवश्यक रहेको समेत रावलले बताए । रावलले हाल आफ्नो बारीमा फलेको फुल र मालाहरू बिक्री गर्न सुरुवात गरिसकेका छन् । प्रति किलो फुललाई ५ देखि ६ सयका दरले बिक्रीबितरण गरिरहेको समेत बताए ।
डोटी जिल्लामा फुल खेतीको राम्रो सम्भावना रहेको कृषि ज्ञान केन्द्र डोटीका प्रमुख गङ्गादत्त अवस्थीले बताउनु भयो । विभिन्न प्रयोजन दसैँ तिहार, मेला महोत्सवलाई केन्द्रित गरी फुलहरू उत्पादन गर्न सके पहाडी जिल्लाहरूमा राम्रो सम्भावना छ ।
दसैँ तिहार र विभिन्न चाडबाडलाई लक्षित गरेर फुल उत्पादन गर्दा बजारीकरणको राम्रो सम्भावना रहेको समेत प्रमुख अवस्थीले बताए । उनले भने बजारमा आवश्यकता अनुसार फुल फुलाउन सक्यो भने समस्या हुँदैन, फुल धेरै दिन टिक्दैन त्यसैले फुलको बजारीकरणमा स्थानीयसरकारहरुले पनि सहयोग गर्न आवश्यक रहेको समेत प्रमुख अवस्थिले बताउनु भयो । स्थानीय सरकारले खादाको सट्टा फुलका मालाको प्रयोग गर्ने नीति अवलम्बन गर्न आवश्यक रहेको समेत बताउनु भयो ।
अहिलेको समयमा विभिन्न सभा समारोह सजाउन ,अतिथिको स्वागत,दसैँ तिहार, मेला, महोत्सव, न्वारानदेखि घाटसम्म र मन्दिरदेखि घरसम्म सयपत्री फूल नै उत्तम मानिँदै आएको पाइन्छ ।
स्थानीय सरकार र विभिन्न सङ्घ संस्थाहरूले सञ्चालन गर्ने औपचारिक कार्यक्रम, मेला महोत्सवमा खादा लाई भन्दा फुलको मालालाई प्राथमिकता दिन सक्यो भने फुल खेतीको प्रबल सम्भावना रहेको देखिन्छ ।
