बैतडी / भारतसँग सीमा जोडिएको बैतडीको झुलाघाट नाका पूर्ण रुपमा खुल्ने भएकाे छ ।
असाेज ९ गतेदेखि पुल मर्मत भैरहेका कारण आंशिक रूपमा मात्रै आवतजावत गर्ने अनुमति दिएकाे थियाे । पुल मर्मत गर्ने कार्य सम्मान भैसकेकाले भाेलि कार्तिक १ गते ( बुधबार ) देखि पूर्णरूपमा आवतजावत गर्न अनुमति दिएकाे जिल्ला प्रशासन कार्यालय बैतडीले जनाएकाे छ ।
पुल जीर्ण भएपछि सीमा समन्वय बैठकमा पुल मर्मत सम्भार गर्ने निर्णय भएको थियो । तर पुल पुरानाे भैसकेकाले बारम्बार मर्मत गर्दा आवतजावत गर्ने सर्वसाधारण लगायतकाहरूले सास्ती खेप्नु परेकाे स्थानीयले बताएका छन् । उक्त पुल करीब दुई सय बर्ष अघि इष्टइण्डिया कम्पनीले निर्माण गरेको हाे ।
पुल पुरानाे भएकाले भारतीय क्षेत्रतर्फ जीर्ण बन्दै गएकाे छ । पुलबाट आवतजावत गर्नेहरूले जाेखिम पनि माेल्नु परेकाे स्थानीयकाे भनाइ छ ।
दशैंकाे पूर्वसन्ध्यामा पुलकाे यात्रा पुर्णरूपमा खुल्दा लागि घर फर्कने नागरिकलाई सहज हुने देखिन्छ । नाका पूर्ण रुपमा सुचारु हुँदा दर्शनार्थी, लगायतका पर्यटकहरूलाइ सहज हुने भएकाे छ ।
