कञ्चनपुर/ आज (साेमबार) चट्याङ लागेर कञ्चनपुरमा आमा–छोरी घाइते भएका छन्।
घाइते हुनेमा जिल्लाको बेलौरी नगरपालिका–२ टेडुवाकी ५५ वर्षीया फुतिया चौधरी र उनकी २१ वर्षीया छोरी पुष्पा चौधरी रहेकाे जिल्ला प्रहरी कार्यालय कञ्चनपुरले जनाएको छ ।
उनीहरू खेतमा काम गरिरहेको अवस्थामा चट्याङ लागेर दुबै आमा–छोरी घाइते भएको प्रहरी कार्यालयले जनाएकाे छ । अहिले घाइते आमा र छाेरीकाे धनगढीस्थित निसर्ग अस्पतालमा उपचार भइरहेको छ ।
आज बेलुकी सुदुरपश्चिमका विभिन्न भूभागमा भिषण हावाहुरी, मेघगर्जन चट्याङसहित परेकाे थियाे ।
त्यस्तै बैतडीमा पनि चट्याङ लागेर एक भैंसी र दुई बाख्रा मरेका छन्। पाटन नगरपालिका–१० का शंकर बिष्टले पालेको भैंसी मरेको छ साथै घरमा जडान गरिएको विद्युतको लाइन जलेर क्षति पुगेको बैतडी प्रहरीले जनाएकाे छ ।
त्यस्तै पाटनमै गणेशदत्त अवस्थी र गोपाल बिष्टले पालेका एक÷एक बाख्रा पनि चट्याङ लागेर मरेका छन्।
चट्याङका कारण पाटन–१० का जयबहादुर बिष्ट, नन्दराज अवस्थी र धनबहादुर बिष्टको घरमा जडान गरिएको विद्युत मिटर बक्सका साथै अन्य उपकरणमा पनि क्षति पुगेको बताइएको छ।
