सरकाले आज (मंगलबार) शाेक घाेषणा गरेकाे छ । नेपाल सरकार, मन्त्रिपरिषद्को साेमबार बसेकाे बैठकबाट निर्णय भए अनुसार साेमबार नेपाल सरकार गृह मन्त्रालयले एक विज्ञप्ति जारी गर्दै राष्ट्रिय शाेक घाेषणा गरेकाे छ ।
विज्ञप्तिमा उल्लेख भएअनुसार दक्षिण इजरायलको किबुज अलुमिम भन्ने स्थानमा प्यालेष्टाइनको हमास समूहले गरेको आक्रमणमा परी १० (दश) जना नेपालीहरुको दुःखद् निधन भएकाले राष्ट्रिय शाेक घाेषणा गरेकाे हाे ।
सरकारले मृतकहरुप्रति श्रद्धाञ्जली, घाइते भएका व्यक्तिहरुको शीघ्र स्वास्थ्यलाभको कामना गर्ने र यस अकल्पनीय घटनामा दिवंगत हुनुभएका नेपालीहरुप्रति सम्मान व्यक्त गर्न असोज आज राष्ट्रिय शोक घोषणा गरेकाे छ ।
आज देशभरका सरकारी कार्यालयहरु र विदेशस्थित नेपाली नियोगहरुमा राष्ट्रिय झण्डा आधा झुकाइने भनिएकाे छ ।
त्यस्तै इजरायल सरकारसँग समन्वय गरी घटनामा निधन भएका नेपालीहरुको शव यथाशीघ्र स्वदेश ल्याउने निर्णय गरिएकाे छ ।
उक्त घटनामा निधन भएका व्यक्तिहरूकाे परिवारलाई राहत उपलब्ध गराउने, वेपत्ता भएका नेपालीको खोजीलाई तीव्रता दिने, फर्कन चाहने नेपालीहरुलाई यथाशीघ्र नेपाल एयरलाइन्स र हिमालय एयरलाइन्सको विमान चार्टर्ड गरी नेपाल ल्याउन प्रबन्ध गर्ने लगायतका मन्त्रिपरिषद्का निर्णयहरु सम्बन्धित मन्त्रालयहरुबाट कार्यान्वयन हुने प्रक्रिया अगाडी बढिसकेको छ भनेर जारी विज्ञप्तिमा उल्लेख गरिएकाे छ ।
सहसचिव / प्रवक्ता नारायण प्रसाद भट्टराईले विज्ञप्तिमा हस्ताक्षर गर्दै घटनाको सम्बन्धमा मानवीय संवेदनशीलता, परिवारजनमा पर्ने मानसिक आघात तथा समाजमा पर्ने असर समेतलाई ध्यानमा राखी सञ्चार माध्यम र सामाजिक सञ्जालमार्फत असान्दर्भिक र असंवेदनशील सामग्रीहरु प्रवाह नगर्न र आ-आफ्नो क्षेत्रबाट जिम्मेवार भूमिका निर्वाह गर्न सम्बद्ध सबैलाई निर्देशन दिएकाे छ ।
त्यस्तै राष्ट्रिय शाेक घाेषणालाई सार्वजनिक विदा नसम्झिन सबैलाई आग्रह गरेकाे छ ।
