डोटी/ सामाजिक र धार्मिक सद्भाव भड्किने संकेत देखिएको भन्दै बाँकेको नेपालगञ्जमा आज मंगलबार दिउँसो १ बजेदेखि अनिश्चितकालीन कर्फ्यू आदेश जारी गरिएको छ । उक्त विषयले संघिय संसदको आजको बैठकमा प्रबेश पाएको छ ।
बाँकेका प्रमुख जिल्ला अधिकारी विपिन आचार्यद्वारा जारी आदेशमा हिन्दु र मुस्लिम समुदायबीच तनाव सिर्जना हुने संकेत देखिएपछि नेपालगञ्ज उपमहानगरपालिका क्षेत्रमा कर्फ्यु जारी भएको हो ।
आज बसेको प्रतिनिधिसभाको बैठकमा आकस्मिक समय, शून्य समय र विशेष समयमा बोल्दै सांसदहरुले जाति र धर्मका नाममा हुन खोजेका अवाञ्छित गतिविधि रोक्न सरकारको हस्तक्षेपकारी भूमिका खेल्नु पर्ने बताएका हुन् ।
बैठकमा बोल्दै राष्ट्रिय प्रजातन्त्र पार्टी (राप्रपा)का सांसद धवलशमशेर जबराले सामाजिक संजालमार्फत सद्भावमा खलल पुर्याउने प्रयास भइरहेको भन्दै नियन्त्रणका लागि सरकारको ध्यानाकर्षण गरेका हुन् । साइबर क्राइमलाई प्रभावकारी रुपमा कारबाहीको दायरामा ल्याउन समेत उनले माग गरेका छन् ।
उनले भने ‘सरकारलाई अनुरोध छ– हिंसाका घटनाहरु तुरुन्तै कन्ट्रोलमा ल्याउनुपर्यो । यो सबैको जड मोबाइल हो । साइबर क्राइमलाई तुरुन्तै कारबाहीको दायरामा ल्याउनुपर्यो ।’ कर्फ्यू जारी भएको उल्लेख गर्दै उनले भने, ‘सद्भावको शहरमा अशान्ति नफैलाउन नेपालगञ्जवासीलाई अनुरोध गर्दछु !’
त्यस्तै नेपाली कांग्रेस सांसद ईश्वरी देवी न्यौपानेले पूँजीवादका कारण नेपाली समाजको एकतामा प्रहार भएको बताइन् । नेकपा एमाले सांसद अमृतादेवी अग्रहरीले देशमा सरकार छ वा छैन भन्ने अवस्था रहेको बताइन् । उक्त बैठकमा बोल्दै कांग्रेस सांसद अम्बिका बस्नेतले पनि समाजमा विभाजन देखा परेको भन्दै सरकारको ध्यानाकर्षण गराईन् ।
हिन्दुहरूको समूह नेपालगञ्जमा भेला भएर प्रदर्शनमा उत्रिएको थिए । ओमकार परिवार, हिन्दु समाज र शिव सेना नेपालले संयुक्त रुपमा बागेश्वरी मन्दिरदेखि सुरु गरेको ¥यालीले बजार परिक्रमा गरेको थियो । ठूलो संख्यामा निस्किएको जुलुसमा घरमाथिबाट ढुंगा र ईंटा प्रहार भएको र स्थिति असामान्य भएपछि कर्फ्यू लगाइएको आचार्यले जारी गरेको आदेशमा उल्लेख गरिएको छ ।
