काठमाण्डौँ/ मदन पुरस्कार २०७९ आख्यानकार विवेक ओझाको उपन्यास ऐँठनलाई दिइने भएको छ भने जगदम्बाश्री २०७९ वरिष्ठ कलाकार टेकवीर मुखियालाई दिने निर्णय गरिएकाे छ ।
मदन पुरस्कार गुठीको आइतबारको बैठकले उक्त निर्णय गरेको छ । आख्यानकार ओझा कैलालीको टीकापुरका स्थानीय हुन् । ओझाको यसअघि ‘ऐलानी’ नामक उपन्यास प्रकाशित छ भने मुखिया लामो समयदेखि ललितकला र पुस्तकका आवरण सिर्जनामा सक्रिय रहेका छन् ।
दुबै पुरस्कारको राशि ४/४ लाख रुपैयाँ सहित प्रमाणपत्र रहेको छ ।
वि.सं २०१२ मा स्थापित मदन पुरस्कार गुठीले पहिलोपल्ट २०१३ सालमा गद्य विधामा सत्यमोहन जोशीको ‘हाम्रो लोक संस्कृति’ सामाजिक शास्त्रमा, चित्तरञ्जन नेपालीको ‘जनरल भीमसेन थापा र तत्कालीन नेपाली तथा विज्ञान’ विधामा बलराम जोशीको ‘अधिकविभव स्थिर विद्युत् उत्पादक’ पुस्तकलाई मदन पुरस्कार प्रदान गरेको थियो । त्याेसँगै सबै भन्दा बढी मदन पुरस्कार पाउनेमा सत्यमाेहन जाेशी रहेका छन् ।
वि .स २०१४ सालमा सबै भन्दा पहिले उपन्यास विधामा लिलाध्वज थापाकाे ‘मन’ ले मदन पुरस्कार प्राप्त गरेकाे थियाे । याेसँगै मदन पुरस्कार गुठीले वि.स २०३१ र ३३ साल बाहेक अरू वर्षमा निरन्तर पुस्तकर प्रदान गर्दै आएकाे छ ।
त्यस्तै विसं २०४५ सालमा रानी जगदम्बाको निधनपछि उनको सम्झना स्वरूप जगदम्बा–श्री पुरस्कारको स्थापना गरिएको थियो । यो सम्मान पहिलोपटक नारायण गोपाललाई दिइएको थियो । नेपाल तथा नेपाल बाहिरबाट प्राप्त नेपाली भाषामा प्रकाशित पुस्तकहरूमध्ये एकलाई मदन पुरस्कार तथा नेपाली भाषा, वाङ्मय तथा संस्कृतिको श्रीवृद्धिमा योगदान गर्ने व्यक्ति र संस्थालाई जगदम्बा–श्री दिइँदै आइएको छ ।
