महेन्द्रनगर / चालु आर्थिक वर्षको पहिलो चौमासिक नसकिदै अख्तियार दुरुपयोग अनुसन्धान आयोगमा सुदूरपश्चिम प्रदेशका दुई सय ८४ उजुरी परेका छन् ।
चालु आर्थिक वर्ष सुरु भएको साढे दुई महिनाको अबधिमा अनियमितता विरुद्धका दुई सय ८४ उजुरी आयोगको कञ्चनपुर स्थित कार्यालयमा दर्ता भएका हुन् ।
आर्थिक बर्षको सुरुवाती महिना अर्थात् श्रावण महिनामा सबै भन्दा बढी उजुरी दर्ता भएका देखिएको छ । उक्त महिनामा अनियमितता विरुद्धका एक सय ७३ उजुरी परेका छन् ।
त्यस्तै भदौ महिनामा ८५ र असोज महिनाको ७ गते सम्ममा २६ गरी कुल दुई सय ८४ उजुरी परेको आयोगको कार्यालय कञ्चनपुले जनाएको छ । उजुरीकर्ताले आयोगको वेभसाइट, भाइबर, हुलाक सेवा, इमेल, टेलिफोन तथा लिखित रुपमै अनियमितता विरुद्ध उजुरी गर्नेको संख्या दैनिक रुपमा बढ्न थालेको छ ।
