आशिष बहादुर सिंह / बझाङ सदरमुकाम चैनपुरमा खानेपानी आपुर्तीका लागी मुहानको अभाव भएको र भएको पानी समेत उचित व्यवस्थापनको अभावमा खानेपानीको समस्या रहेको जिल्ला सदरमुकाम चैनपुरमा अव सेती नदीको पानी लिफ्टबाट तानेर वितरण गरिने भएको छ ।
एसियाली विकास बैङकको आर्थिक सहयोगमा नेपाल सरकार साना शहरी खानेपानी योजना अन्तरगत सदरमुकाम चैनपुरमा खानेपानी योजना निर्माण सुरु भएको हो । आयोजना निर्माणका लागि २०७६ सालमा ठेक्का पाएको आशिस सीएबी जेवि निर्माण कम्पनीले काम सुरु गरेको हो ।
जम्मा २१ करोड ७३ लाखको लागतमा निर्माण हुने चैनपुर साना शहरी खानेपानी योजनाले सिमभाडीमा ७ लाख क्षमताका चारवटा ट्याङ्की सहित नदीको पानी फिल्टर गर्ने अन्य प्रविधिसहितका पुर्वाधारहरु निर्माण गर्न लागेको छ । बझाङ जिल्लामा लिफ्टबाट खानेपानीको बितरण हुने यो पहिलो योजना हो ।
सदरमुकाम चैनपुर वजार क्षेत्र सहित आसपासका बस्तीहरु भोपुर, दम्दुर, देवल लगायतका वस्तीमा खानेपानी वितरण गरिने यो योजनावाट ११ सय ६५ धारा निर्माण गरिने आयोजनाका ईन्जिनियर विनित जोशीले वताए । निर्माण भइरहेको योजना २० वर्ष सम्मको जनसंख्यालाई मध्यनजर गरि निर्माण गरिएको जनाइएको छ । योजनाको ७० र उपभोक्ताको ३० प्रतिशत लागतमा निर्माण भरहेको यो योजनावाट ३ हजार ७ सय ५० परिवार लाभाम्वीत हुनेछन् ।
योजनाले हाल ट्याङकी निर्माण सहित अन्य संरचनाहरु निर्माण गरिहेको छ । मिटर प्रविधिवाट पानीको वितरण हुने यस योजनाको अहिलेसम्म ५१ प्रतिशत काम सकिएको छ । साना शहरी खानेपानी योजनाको काम सम्पन्न भएपछि बझाङ सदरमुकाम चैनपुरका साथै नजिकका वस्तीका जनता खानेपानीबाट लाभाम्वीत हने उपभोक्ता समितिका अध्यक्ष लोकेन्द्र विष्टले वताए ।
योजनाले विपन्न असाहय ३ हजार ७ सय ५० परिवारलाई धारा र शौचालयमा निर्माणमा अनुदान समेत दिएको जनाएको छ । एक धारा जडान गर्दा २० हजार तिर्नुपर्ने भएपनि अहिले छुटेका परिवारले १६ हजार तिरे धारा जडान गर्न सकिने चैनपुर खानेपानी उपभोक्ता समितिले जनाएको छ । निर्माण कम्पनीले आउदो चैत्र महिनासम्म खानेपानी योजना निर्माण सम्पन्न गर्ने लक्ष्य राखेको छ ।
